തൃശ്ശൂര് വെളപ്പായയില് ടിടിഇയെ യാത്രക്കാരന് ട്രെയിനില് നിന്ന് തള്ളിയിട്ട് കൊലപ്പെടുത്തിയ സംഭവം വേദനാജനകമെന്ന് മുഖ്യമന്ത്രി പിണറായി വിജയന്. പ്രതിക്ക് അര്ഹമായ ശിക്ഷ വാങ്ങിക്കൊടുക്കുമെന്നും അതിനു വേണ്ട നടപടികള് പെട്ടെന്ന് തന്നെ സ്വീകരിക്കുമെന്നും മുഖ്യമന്ത്രി പറഞ്ഞു.
‘ഔദ്യോഗിക കൃത്യനിര്വഹണത്തിനിടെ റെയില്വെ ടിടിഇ കെ വിനോദ് ദാരുണമായി കൊല്ലപ്പെട്ടത് ഏറെ വേദനാജനകമാണ്. എറണാകുളം മഞ്ഞുമ്മല് സ്വദേശിയായ വിനോദിന്റെ വേര്പാടില് കുടുംബാംഗങ്ങളുടെയും സുഹൃത്തുക്കളുടെയും സഹപ്രവര്ത്തകരുടെയും ദുഃഖത്തില് പങ്കുചേരുന്നു. പ്രതിക്ക് അര്ഹമായ ശിക്ഷ വാങ്ങിക്കൊടുക്കുന്നതിന് ആവശ്യമായ നടപടി എടുക്കും’. മുഖ്യമന്ത്രി ഫേസ്ബുക്കില് കുറിച്ചു.
ടിക്കറ്റ് ചോദ്യം ചെയ്തതിനെ തുടര്ന്നാണ് വാക്കുതര്ക്കമുണ്ടായത്. പിന്നീട് ഫൈന് അടക്കണമെന്ന് വിനോദ് പറഞ്ഞതോടെ വിനോദിനെ കൊലപ്പെടുത്താനുള്ള ഉദ്ദേശത്തോടെ ട്രെയിനില് നിന്ന് പ്രതി രജനീകാന്ത് തള്ളിയിടുകയായിരുന്നു. വാതിലിന് അഭിമുഖമായി നിന്ന വിനോദിനെ പിന്നില് നിന്ന് തള്ളിയിടുകയായിരുന്നു.
