പൊതുസ്ഥലത്ത് മാലിന്യം വലിച്ചെറിയുന്നവര്ക്കെതിരെ കര്ശന നടപടിയെടുക്കാന് സര്ക്കാര് നിര്ദ്ദേശം. ആമയിഴഞ്ചാന് അപകടത്തില് മുഖ്യമന്ത്രി വിളിച്ച യോഗത്തിലാണ് തീരുമാനം. നിരോധിത പ്ലാസ്റ്റിക് ക്യാരി ബാഗുകളും ഉല്പ്പന്നങ്ങളും ഉപയോഗിക്കുന്നവര്ക്കെതിരെ കര്ശന നടപടിയെടുക്കും. കൂടാതെ പൊതുനിരത്തില് മാലിന്യം നിക്ഷേപിക്കുന്ന വാഹന രജിസ്ട്രേഷന് റദ്ദാക്കും. നഗരത്തിലെ മാലിന്യ പ്രശ്നം പരിഹിക്കുന്നതിനുള്ള പ്രവര്ത്തനങ്ങളുടെ മേല്നോട്ടത്തിനും സുഗമമായ നടത്തിപ്പിനും ഡിസാസ്റ്റര് മാനേജ്മെന്റ് ആക്ടിലെ വകുപ്പുകള് ഉപയോഗപ്പെടുത്തും.
മാലിന്യം നിക്ഷേപിക്കുന്നതിനെതിരെ പൊലീസിന്റെയും നഗരസഭയുടെയും നിരീക്ഷണം ശക്തമാക്കും. പൊലീസ് കണ്ട്രോള് റൂമുമായി ബന്ധിപ്പിക്കുന്ന 40 എ ഐ ക്യാമറകള് സ്ഥാപിക്കും. ജില്ലാ കളക്ടറുടെ മേല്നോട്ടത്തില് സബ് കളക്ടറെ പ്രവര്ത്തനങ്ങള് ഏകോപിപ്പിക്കാനുള്ള സ്പെഷ്യല് ഓഫീസറായി ചുമതലപ്പെടുത്തും. മേജര് ഇറിഗേഷന്, കോര്പ്പറേഷന്, റെയില്വേ എന്നീ മൂന്ന് വിഭാഗങ്ങളുടെയും ഏകോപനം ഉറപ്പാക്കും. പൊതുനിരത്തിലും ജലാശയത്തിലും മാലിന്യം നിക്ഷേപിക്കുന്ന വാഹനങ്ങളുടെ രജിട്രേഷന് റദ്ദ് ചെയ്യുന്നതുള്പ്പെടെയുള്ള കര്ശന നടപടികള് സ്വീകരിക്കും.
സാംക്രമിക രോഗങ്ങള് തടയാന് മാലിന്യ നീക്കം പ്രധാനമാണെന്ന് മുഖ്യമന്ത്രി പറഞ്ഞു. എല്ലാ ദിവസവും ശാസ്ത്രീയമായ മാലിന്യ സംസ്ക്കരണം റെയില്വേ ഉറപ്പു വരുത്തണം. തമ്പാനൂര് റെയില്വേ സ്റ്റേഷനിലൂടെ ഒഴുകുന്ന 130 മീറ്റര് നീളമുള്ള ടണല് ശുചീകരിക്കണമെന്ന് ഇന്ത്യന് റെയില്വേയോട് നിര്ദേശിച്ചു.
ആമയിഴഞ്ചാന് രക്ഷാദൗത്യത്തില് സാഹസികമായി പങ്കെടുത്തവരെ പ്രത്യേകിച്ച് സ്കൂബ ടീമിനെ മുഖ്യമന്ത്രി അഭിനന്ദിച്ചു. ട്രയിനുകളില് നിന്നും ശേഖരിക്കുന്ന മാലിന്യങ്ങള് ശാസ്ത്രീയമായി സംസ്കരിക്കുന്നുവെന്ന് ഉറപ്പാക്കാന് റെയില്വേ എഞ്ചിനീയറിംഗ് വിഭാഗം ആഴ്ചയിലൊരിക്കല് പരിശോധന നടത്തണം.
