വയനാട്ടിലെ ഉരുള്പൊട്ടലില് കാണാതായവര്ക്കുള്ള തിരച്ചിലിനായി ദുരന്തമുഖത്തേക്ക് പൊലീസ് നായ്ക്കളായ മായയും മര്ഫിയും. പെട്ടിമുടി ദുരന്തത്തില് നിന്ന് 8 മൃതദേഹങ്ങള് കണ്ടെത്തിയത് മായ എന്ന പൊലീസ് നായയായിരുന്നു. മണ്ണിനടിയില് നിന്നും മനുഷ്യശരീരം കണ്ടെത്താന് പരിശീലനം ലഭിച്ച നായ്ക്കളാണ് രണ്ടും. രക്ഷാപ്രവര്ത്തനത്തിന് മായയുടേയും മര്ഫിയുടേയും സാന്നിധ്യം വലിയ സഹായമേകുമെന്നത് ഉറപ്പാണ്. 30 അടിയില് നിന്നുവരെ മനുഷ്യശരീരങ്ങള് കണ്ടെത്താന് പരിശീലനം നേടിയ നായകളാണ് മായയും മര്ഫിയും. 2020 സേനയില് ചേര്ന്ന ഇവര് ബല്ജിയന് മലിന്വ ഇനത്തില്പ്പെട്ടതാണ്. നിരവധി ആളുകള് മണ്ണിനടിയില് അകപ്പെട്ടിട്ടുണ്ടെന്നാണ് നാട്ടുകാര് പറയുന്നത്. ആഴത്തിലുള്ള പരിശോധനക്ക് നായകള് വേണ്ടിവരും.
പുലര്ച്ചെ രണ്ടു മണിയോടെയാണ് മുണ്ടക്കൈയില് ഉരുള്പ്പൊട്ടിയത്. മരണസംഖ്യ 60 ആയി. ഒറ്റപെട്ടവരെയെല്ലാം സുരക്ഷിതമാക്കി പുറത്ത് എത്തിക്കാനാണ് ശ്രമങ്ങള് നടത്തുന്നത്. പുലര്ച്ചെ രക്ഷാപ്രവര്ത്തനം നടത്തുന്നതിനിടെ വലിയ രീതിയില് മലവെള്ളപ്പാച്ചിലും മണ്ണിടിച്ചിലും ഉണ്ടാവുകയും ചെയ്തു. രക്ഷാപ്രവര്ത്തകര് ഉള്പ്പെടെ ഓടിരക്ഷപ്പെട്ടു. നിരവധി വാഹനങ്ങള് ഒഴുകിപോയി. വീടുകളിലും വെള്ളവും ചെളിയും കയറി.
പ്രതികൂല കാലാവസ്ഥ കാരണം എയര് ലിഫ്റ്റിങ്ങ് പ്രായോഗികമാവില്ല എന്നാണ് വിലയിരുത്തല് കോപ്റ്ററുകള് കോഴിക്കോട് ലാന്ഡ് ചെയ്യുമെന്ന് അറിയിച്ചിട്ടുണ്ട്. വെള്ളാര്മല സ്കൂള് തകര്ന്നു. ഇവിടെ ദുരിതാശ്വാസ ക്യാമ്പ് പ്രവര്ത്തിച്ചിരുന്നായും വിവരങ്ങള് പുറത്തുവന്നിരുന്നു. വെള്ളാര്മല സ്കൂളിലെ ദുരിതാശ്വാസ ക്യാമ്പില്നിന്ന് രാത്രി ഒരു മണിയോടെ ആളുകള് ഒഴിഞ്ഞിരുന്നു. 14 കുടുംബങ്ങളാണ് ഇവിടെ ഉണ്ടായിരുന്നത്.
