കൊല്ലം: കൊല്ലം കൊട്ടാരക്കരയില് നായക്കുട്ടിയുമായി ബസ്സില് കയറിയതിനെ ചൊല്ലി തര്ക്കം. യുവാക്കളും ബസ് യാത്രക്കാരും തമ്മില് കൂട്ടയടി. വീഡിയോ സോഷ്യല്മീഡിയയില് പ്രചരിക്കുകയാണ്. യുവാക്കളെ പൊലീസ് പിടികൂടി സ്റ്റേഷന് ജാമ്യത്തില് വിട്ടയച്ചു. കൊല്ലത്തേക്ക് പോകുന്ന ബസിലാണ് നായക്കുട്ടിയുമായി യുവാക്കള് കയറിയത്.
ഇന്നലെ വൈകീട്ടായിരുന്നു സംഭവം. പുത്തൂരില് നിന്നും കൊല്ലത്തേക്ക് പോയ ബസിലാണ് നായക്കുട്ടിയുമായി രണ്ടു യുവാക്കള് കയറിയത്. വിദ്യാര്ത്ഥികളും ഒട്ടേറെ യാത്രക്കാരും അടക്കം തിരക്കുള്ള സമയമായതിനാല് നായക്കുട്ടിയുമായി കയറരുതെന്ന് ബസ് ജീവനക്കാര് ആവശ്യപ്പെട്ടു. എന്നാല് അതുവകവെയ്ക്കാതെയാണ് യുവാക്കള് കയറിയത്.
ബസില് വെച്ച് നായ ബഹളം വെച്ചതോടെ തര്ക്കമായി. ഇതേത്തുടര്ന്ന് നായക്കുട്ടിയുമായി ഇറങ്ങണെന്ന് വിദ്യാര്ത്ഥികളും ബസ് ജീവനക്കാരും ആവശ്യപ്പെട്ടു. തുടര്ന്ന് വാക്കേറ്റവും കയ്യാങ്കളിയിലുമെത്തുകയായിരുന്നു. യുവാക്കള് വിദ്യാര്ത്ഥികളെ മര്ദ്ദിച്ചു. ഇതോടെ വിദ്യാര്ത്ഥികള് സംഘം ചേര്ന്ന് യുവാക്കളെയും നേരിട്ടു. ബസിനുള്ളിലും പുറത്തിറങ്ങിയും പരസ്പരം ഏറ്റുമുട്ടി. നാട്ടുകാര് കൂടി ഇടപെട്ടാണ് ഇരുവിഭാഗത്തെയും പിന്തിരിപ്പിച്ചത്. തുടര്ന്ന് പൊലീസെത്തി യുവാക്കളെ കസ്റ്റഡിയിലെടുക്കുകയായിരുന്നു.
