ന്യൂഡല്ഹി: വയനാട്ടില് നടന്ന വന്യജീവി ആക്രമണത്തില് കൊല്ലപ്പെട്ടവരുടെ കുടുംബാംഗങ്ങളെ കേന്ദ്ര വനം പരിസ്ഥിതി മന്ത്രാലയം വകുപ്പ് മന്ത്രി ഭൂപേന്ദ്ര സിംഗ് യാദവ് ഇന്ന് സന്ദര്ശിക്കും. വയനാട്ടിലെ കോണ്ഗ്രസ് നേതാവ് രാഹുല് ഗാന്ധിയുടെ മണ്ഡലത്തിലേക്ക് ബിജെപി നേതാക്കള് ഇന്നെത്തും.
സ്ഥിതിഗതികള് അവലോകനം ചെയ്യാന് കേന്ദ്ര പരിസ്ഥിതി മന്ത്രി ഭൂപേന്ദര് യാദവ് യോഗം വിളിക്കുകയും പരിഹാരം കാണാന് വയനാട്ടിലെത്തുമെന്ന് അറിയിക്കുകയും ചെയ്തു. മനുഷ്യ ജീവന് സംരക്ഷിക്കുന്നതിനും പാരിസ്ഥിതിക സന്തുലിതാവസ്ഥ നിലനിര്ത്തുന്നതിനും ആവശ്യമായതെല്ലാം ചെയ്യാന് ഞങ്ങള് പ്രതിജ്ഞാബദ്ധരാണെന്ന് അദ്ദേഹം പറഞ്ഞു.
വന്യമൃഗങ്ങള് ഇടയ്ക്കിടെ കൃഷിയിടങ്ങളില് നുഴഞ്ഞുകയറുകയും വിളകള് നശിപ്പിക്കുകയും ജീവനും സ്വത്തിനും നാശം വരുത്തുകയും ചെയ്യുന്ന വിഷയം ബിജെപി സംസ്ഥാന ഘടകം ഏറ്റെടുത്തു. വയനാട്ടില് നിന്നുള്ള പ്രതിനിധിയായിട്ടും രാഹുല്ഗാന്ധി പ്രശ്നങ്ങളോട് കാര്യമായി പ്രതികരിച്ചില്ലെന്ന് പാര്ട്ടി കുറ്റപ്പെടുത്തി. വൈകിട്ടോടുകൂടി ബംഗളൂരുവില് നിന്നെത്തുന്ന മന്ത്രി കാട്ടാന ആക്രമണത്തില് മരിച്ച പടമലയിലെ അജീഷിന്റെ വീട്ടിലും പാക്കത്തെ പോളിന്റെ വീട്ടിലും കാട്ടാനയുടെ ആക്രമണത്തില് പരിക്കേറ്റ വിദ്യാര്ത്ഥി ശരത്തിന്റെ വീട്ടുകാരെയും സന്ദര്ശിക്കും.
