ചെന്നൈയില് കനത്ത കാറ്റിലും മഴയിലും നിര്മ്മാണത്തിലിരിക്കുന്ന മതില് തകര്ന്ന് രണ്ട് പേര് മരിച്ചു. ചെന്നൈ ഈസ്റ്റ് കോസ്റ്റ് റോഡിലാണ് അപകടം നടന്നത്. കനത്ത മഴയെത്തുടര്ന്ന് തമിഴ്നാടിന്റെ തലസ്ഥാനത്തും സമീപ ജില്ലകളിലും കോടതികളും സ്കൂളുകളും സര്ക്കാര് ഓഫീസുകളും ബാങ്കുകളും അടച്ചിടാന് നിര്ദ്ദേശം നല്കി. 10 അന്താരാഷ്ട്ര വിമാനങ്ങള് ബെംഗളൂരുവിലേക്ക് തിരിച്ചുവിട്ടു. ഉച്ചയോടെ മൈചോങ് ചുഴലിക്കാറ്റ് ശക്തമായ ചുഴലിക്കാറ്റായി മാറുമെന്നതിനാല് കൂടുതല് മഴ പ്രതീക്ഷിക്കുന്നതായി റീജണല് മെറ്റീരിയോളജിക്കല് സെന്റര് (ചെന്നൈ) ഡയറക്ടര് എസ് ബാലചന്ദ്രന് പറഞ്ഞു.
ചെന്നൈയില് നിന്ന് 110 കിലോമീറ്റര് അകലെയായിരുന്നു ചുഴലിക്കാറ്റ്, ചൊവ്വാഴ്ച ആന്ധ്രാപ്രദേശിലെ നെല്ലൂരിനും മച്ചിലിപട്ടണത്തിനും ഇടയില് കരയില് പതിക്കുമെന്നും മണിക്കൂറില് 90-100 കിലോമീറ്റര് വേഗതയില് കാറ്റ് വീശുമെന്നുമാണ് പറയുന്നത്.
ചെന്നൈയിലെ ഗുഡുവാഞ്ചേരി നഗരപ്രാന്തത്തിലെ താമസക്കാര് ഉയര്ന്ന സ്ഥലത്തേക്ക് മാറി. രാത്രി പെയ്ത മഴയെ തുടര്ന്ന് നഗരത്തിലെ ജലാശയങ്ങളില് നിന്ന് മഗര് മുതലകള് ഇറങ്ങി. ദേശീയ ദുരന്തനിവാരണ സേനയുടെയും സംസ്ഥാന ദുരന്തനിവാരണ സേനയുടെയും 10 ടീമുകള് ദുരിതാശ്വാസ, രക്ഷാപ്രവര്ത്തനങ്ങള് നടത്തുന്നതിനാല് തമിഴ്നാട്ടിലുടനീളം താഴ്ന്ന പ്രദേശങ്ങളില് താമസിക്കുന്ന ആളുകളെ നേരത്തെ ദുരിതാശ്വാസ കേന്ദ്രങ്ങളിലേക്ക് മാറ്റിയിരുന്നു.
