വയനാട്: പ്രധാനമന്ത്രി നരേന്ദ്രമോദി പ്രചാരണത്തിനായി വയനാട്ടിലെത്തുമെന്ന് സൂചന. വയനാട്ടിലും കേരളത്തിലെ മറ്റൊരു മണ്ഡലത്തിലും പ്രചാരണം നടത്തുമെന്നാണ് ബിജെപി വൃത്തങ്ങള് അറിയിച്ചത്. ബിജെപിയുടെ ദേശീയ നേതാക്കളുടെ ഒരു നിരയും വരും ദിവസങ്ങളില് സംസ്ഥാനത്ത് പ്രചാരണത്തിനൊരുങ്ങുന്നുണ്ട്. അതേ സമയം, രാജീവ് ചന്ദ്രശേഖരന്റെ തെരഞ്ഞടുപ്പ് പ്രചാരണത്തിന്റെ ഭാഗമായുള്ള റോഡ് ഷോയില് അമിത് ഷാ പങ്കെടുക്കുമെന്ന് ബിജെപി അധ്യക്ഷന് കെ സുരേന്ദ്രന് പറഞ്ഞു. കോഴിക്കോട് എംടി രമേശിന്റെ തെരഞ്ഞെടുപ്പ് പ്രചാരണത്തിനായി നാളെ ബിജെപി ദേശീയ അധ്യക്ഷന് ജെപി നഡ്ഡയുമെത്തും.
സിറ്റിംഗ് എംപി രാഹുല് ഗാന്ധിക്കെതിരെ മത്സരിക്കുന്ന പാര്ട്ടി സംസ്ഥാന അധ്യക്ഷന് കെ.സുരേന്ദ്രനുവേണ്ടി പ്രധാനമന്ത്രി മോദി വയനാട്ടില് പ്രചാരണത്തിനിറങ്ങും. സിപിഐയുടെ ആനി രാജയാണ് മണ്ഡലത്തില് മത്സരിക്കുന്ന മറ്റൊരു പ്രമുഖ സ്ഥാനാര്ത്ഥി. ഉത്തര്പ്രദേശ് മുഖ്യമന്ത്രി യോഗി ആദിത്യനാഥ്, മഹാരാഷ്ട്ര ഉപമുഖ്യമന്ത്രി ദേവേന്ദ്ര ഫഡ്നാവിസ്, കേന്ദ്രമന്ത്രി ധര്മേന്ദ്ര പ്രധാന്, ബി.ജെ.പിയുടെ തമിഴ്നാട് പ്രസിഡന്റ് അണ്ണാമലൈ തുടങ്ങിയവര് ഉള്പ്പെടെയുള്ള സ്റ്റാര് ബി.ജെ.പി പ്രചാരകര് സംസ്ഥാനത്തും പ്രചാരണം നടത്തും.
ഇന്ന് വൈകിട്ടോടെ തിരുവനന്തപുരം വിമാനത്താവളത്തിലെത്തുന്ന അമിത്ഷായ്ക്ക് ബിജെപി നേതാക്കള് വന്സ്വീകരണം നല്കും. നാളെ രാവിലെ പദ്മനാഭ സ്വാമി ക്ഷേത്രത്തില് ദര്ശനം നടത്തിയതിന് ശേഷമാണ് തെരഞ്ഞെടുപ്പ് പ്രചാരണം ആരംഭിക്കുന്നത്. രാവിലെ 10.30 ഓടെയാണ് നെയ്യാറ്റിന്കരയില് അമിത്ഷാ യുടെ റോഡ് ഷോ ആരംഭിക്കുന്നത്. റോഡ് ഷോയില് അമിത്ഷായോടൊപ്പം മുതിര്ന്ന ബിജെപി നേതാക്കളും പങ്കെടുക്കും. നിരവധി എന്ഡിഎ സ്ഥാനാര്ത്ഥികള് തങ്ങളുടെ മണ്ഡലങ്ങളില് പ്രചാരണം നടത്താന് പ്രധാനമന്ത്രി മോദിയോട് അഭ്യര്ത്ഥിച്ചിട്ടുണ്ടെങ്കിലും വയനാടിന് ശേഷം ഒരു മണ്ഡലത്തില് കൂടി അദ്ദേഹം പ്രചാരണത്തിന് എത്തിയേക്കും.
