ദില്ലി: വിവാദ പ്രസംഗം നടത്തിയ പ്രധാനമന്ത്രി നരേന്ദ്ര മോദിക്കെതിരെ പൊലീസില് പരാതി നല്കി സിപിഎം. രാജസ്ഥാനില് പ്രധാനമന്ത്രി നരേന്ദ്ര മോദി നടത്തിയ പ്രസ്താവനയുമായി ബന്ധപ്പെട്ടാണ് പരാതി. പിബി അംഗം ബൃന്ദ കാരാട്ട്, ദില്ലി സ്റ്റേറ്റ് സെക്രട്ടറിയേറ്റ് അംഗം പുഷ്പീന്ദര് സിങ് ഗ്രെവാള് എന്നിവരാണ് പരാതിക്കാര്. നരേന്ദ്ര മോദി സമുദായങ്ങള്ക്ക് ഇടയില് ശത്രുത വളര്ത്തുന്ന പരാമര്ശം നടത്തി, ദേശീയോദ്ഗ്രഥനത്തിന് വിഘാതമാകുന്ന പ്രസ്താവന നടത്തി എന്നുമാണ് പരാതിയില് ആരോപിച്ചിരിക്കുന്നത്.
എന്നാല് പൊലീസ് സ്റ്റേഷനില് പരാതി സ്വീകരിച്ചില്ല. തുടര്ന്ന് പരാതി ദില്ലി പൊലീസ് കമ്മീഷണര്ക്ക് അയച്ചുകൊടുത്തു. രാജസ്ഥാനിലെ തെരഞ്ഞെടുപ്പ് റാലിയില് ഇന്നലെ നടത്തിയ പ്രസംഗത്തിലാണ് മുസ്ലീംങ്ങള്ക്കെതിരെ കടുത്ത വിഭാഗീയ പരാമര്ശങ്ങള് മോദി നടത്തിയത്. കോണ്ഗ്രസ് അധികാരത്തില് എത്തിയാല് ആദ്യ പരിഗണന നല്കുക മുസ്ലീംങ്ങള്ക്കായിരിക്കുമെന്നും കഷ്ടപ്പെട്ട് മറ്റുള്ളവരുണ്ടാക്കിയ പണവും സ്ത്രീകളുടെ കെട്ടുതാലി പോലും കൂടുതല് കുട്ടികളുണ്ടാകുന്ന, നുഴഞ്ഞു കയറ്റക്കാരായ വിഭാഗത്തിലേക്ക് പോകുമെന്നും പ്രധാനമന്ത്രി പറഞ്ഞിരുന്നു. ഈ പ്രസംഗമാണ് വിവാദത്തിനിടയാക്കിയത്.
