തിരുവനന്തപുരം: ജൂണ് മൂന്നിന് സ്കൂള് തുറക്കുന്നതുമായി ബന്ധപ്പെട്ട മുന്നൊരുക്ക പ്രവര്ത്തനങ്ങള് സമയബന്ധിതമായി പൂര്ത്തീകരിക്കണമെന്ന് മുഖ്യമന്ത്രി പിണറായി വിജയന് നിര്ദ്ദേശിച്ചു. ജൂണ് മൂന്നിന് പ്രവേശനോത്സവത്തോടെ ഈ അദ്ധ്യയന വര്ഷം ആരംഭിക്കുമെന്ന് ഉന്നതതല യോഗത്തില് മുഖ്യമന്ത്രി അറിയിച്ചു.
അതേ സമയം, സ്കൂള് തുറക്കുന്നതിന് മുമ്പായി പാലിക്കേണ്ട മാര്ഗ്ഗ നിര്ദ്ദേശങ്ങളും പുറപ്പെടുവിച്ചിട്ടുണ്ട്. അദ്ധ്യയന വര്ഷം ആരംഭിക്കുന്നതിനു മുന്പ് സ്കൂളിന്റെ സുരക്ഷ ഉറപ്പാക്കണം. സ്കൂളിന്റെ അറ്റകുറ്റ പണികള് നടത്തണം. സ്കൂളും പരിസരവും വൃത്തിയാണെന്ന് ഉറപ്പു വരുത്തുക, എല്ലാ സ്കൂള് കെട്ടിടങ്ങള്ക്കും ഫിറ്റ്നസ് സര്ട്ടിഫിക്കറ്റ് ലഭ്യമാക്കണം, സ്കൂളുകളില് നിര്ത്തിയിട്ട ഉപയോഗശൂന്യമായ വാഹനങ്ങള് നീക്കം ചെയ്യണം, ഉപയോഗശൂന്യമായ ഫര്ണിച്ചര്, മറ്റ് ഉപകരണങ്ങള് എന്നിവ നീക്കം ചെയ്യുകയോ പ്രത്യേക മുറിയില് സൂക്ഷിക്കുകയോ വേണം.
കൂടാതെ, സ്കൂള് പരിസരത്തെ അപകടാവസ്ഥയിലുള്ള മരങ്ങള്, ബോര്ഡുകള്, ഹോര്ഡിംഗ്സ് എന്നിവ മാറ്റണം. സ്കൂളിലേയ്ക്കുളള വഴി, പരിസരം എന്നിവിടങ്ങളിലെ അപകടാവസ്ഥയില് നില്ക്കുന്ന വൈദ്യുത പോസ്റ്റുകള്, വൈദ്യുത കമ്പികള് എന്നിവ ഒഴിവാക്കണമെന്നും നിര്ദ്ദേശമുണ്ട്. സ്കൂള് ബസ്സുകള്, സ്കൂളില് കുട്ടികളെ എത്തിക്കുന്ന മറ്റ് സ്വകാര്യ വാഹനങ്ങള് എന്നിവയുടെ ഫിറ്റ്നസ് പരിശോധിച്ച് സര്ട്ടിഫിക്കറ്റ് ലഭ്യമാക്കണം.
