ചെന്നൈ: തമിഴ്നാട്ടിലെ വ്യാജമദ്യ ദുരന്തത്തില് മരണസംഖ്യ 34 ആയി. 80ലധികം പേര് വിവിധ ആശുപത്രികളില് ചികിത്സയില് തുടരുകയാണ്. ഇതില് 14 പേരുടെ നില ഗുരുതരമാണ്. ഇന്നലെ വൈകിട്ടോടെയാണ് തമിഴ്നാട് കള്ളക്കുറിച്ചിയില് വ്യാജമദ്യ ദുരന്തമുണ്ടാവുന്നത്. മരിച്ചവരുടെ പോസ്റ്റ്മോര്ട്ടം റിപ്പോര്ട്ട് ഡോക്ടര്മാരുടെ പാനല് ഉടന് കൈമാറും. മുഖ്യമന്ത്രി എംകെ സ്റ്റാലിനും മന്ത്രി ഉദയനിധി സ്റ്റാലിനും കള്ളാക്കുറിച്ചി സന്ദര്ശിക്കും. സര്ക്കാരിന്റെ ഭാഗത്ത് നിന്നുണ്ടായ ഗുരുതര പിഴവാണ് വ്യാജമദ്യ വിതരണം കൂടുന്നതെന്നും ദുരന്തത്തിനുള്ള പൂര്ണ ഉത്തരവാദിത്വം സര്ക്കാരിനാണെന്നും പ്രതിപക്ഷം ആരോപിച്ചു.
സംഭവത്തില് രണ്ട് പേരെ കസ്റ്റഡിയിലിലെടുക്കുകയും നിയമവിരുദ്ധമായി സൂക്ഷിച്ച 200 ലിറ്റര് മദ്യം പിടിച്ചെടുക്കുകയും ചെയ്തിട്ടുണ്ട്. മദ്യവില്പ്പന നടത്തിയവരെയാണ് പൊലീസ് കസ്റ്റഡിയിലെടുത്തത്. ഇവരെ ചോദ്യം ചെയ്തുവരികയാണ്. മദ്യത്തില് മെഥനോളിന്റെ സാന്നിധ്യം ഫോറന്സിക് പരിശോധയില് സ്ഥിരീകരിച്ചിരുന്നു. കള്ളാക്കുറിച്ചിയിലുണ്ടായ ദുരന്തം സര്ക്കാരിന് മേല് രാഷ്ട്രീയ ആയുധമാക്കാനാണ് പ്രതിപക്ഷ തീരുമാനം. വിഷമദ്യ വില്പ്പന ഇല്ലാതാക്കാന് ഡിഎംകെ സര്ക്കാരിന് ഇതുവരെയും കഴിഞ്ഞില്ലെന്ന് സംഭവത്തെ അപലപിച്ച് പ്രതിപക്ഷ നേതാവ് എടപ്പാടി പളനിസ്വാമി പറഞ്ഞു.
