കോഴിക്കോട് വീണ്ടും മസ്തിഷ്ക ജ്വരം സ്ഥിരീകരിച്ചു. കോഴിക്കോട് പയ്യോളി സ്വദേശിയായ 14 കാരനാണ് രോഗബാധ. രണ്ട് മാസത്തിനിടെ നാലാമത്തെ കേസാണ് സ്ഥിരീകരിക്കുന്നത്. സ്വകാര്യ ആശുപത്രിയില് ചികിത്സയിലാണ് കുട്ടി.
അമീബിക് മസ്തിഷ്ക ജ്വരം ബാധിച്ച് അടുത്തിടെ മൂന്ന് കുട്ടികള് മരിച്ച സാഹചര്യത്തില് വിഷയം ചര്ച്ച ചെയ്യാന് മുഖ്യമന്ത്രി പിണറായി വിജയന്റെ അധ്യക്ഷതയില് ഉന്നത തല യോഗം ചേര്ന്നു. വൃത്തിഹീനമായ ജലാശയങ്ങളില് കുളിക്കാന് ഇറങ്ങരുതെന്ന് മുഖ്യമന്ത്രി നിര്ദ്ദേശിച്ചു. സ്വിമ്മിംഗ് പൂളുകള് നന്നായി ക്ലോറിനേറ്റ് ചെയ്യണം. കുട്ടികളിലാണ് അസുഖം കൂടുതലായി ബാധിക്കുന്നത്. അതിനാല് കുട്ടികള് ജലാശയങ്ങളില് ഇറങ്ങുമ്പോള് ജാഗ്രത പാലിക്കണമെന്നും മുഖ്യമന്ത്രി പറഞ്ഞു.
കെട്ടിക്കിടക്കുന്ന വെള്ളത്തില് കാണപ്പെടുന്ന ‘ബ്രെയിന് ഈറ്റര്’ എന്ന പേരില് അറിയപ്പെടുന്ന അമീബ മനുഷ്യരുടെ മൂക്കിലെ നേര്ത്ത തൊലിയിലൂടെ ശരീരത്തില് പ്രവേശിക്കുകയും തലച്ചോറിനെ ഗുരുതരമായി ബാധിക്കുന്ന മസ്തിഷ്ക ജ്വരം ഉണ്ടാക്കുകയും ചെയ്യുന്ന അവസ്ഥയാണ് അമീബിക് മസ്തിഷ്ക ജ്വരം.
