തിരുവനന്തപുരത്ത് ആമയിഴഞ്ചാന് തോട്ടിലെ മാലിന്യക്കൂമ്പാരത്തില് വീണ ആളെ രക്ഷിക്കാന് നടത്തുന്ന ശ്രമം വിജയത്തില് എത്തട്ടേയെന്നു പ്രാര്ത്ഥിക്കുന്നുവെന്ന് പ്രതിപക്ഷ നേതാവ് വിഡി സതീശന്. നഗരത്തിലെ മുഴുവന് മാലിന്യവുമാണ് അവിടെ അടിഞ്ഞു കൂടിയിരിക്കുന്നത്. നിലവില് സ്കൂബാ ഡൈവിങ് ടീമും റോബോട്ട്സും അവിടെ എത്തുകയും മാലിന്യങ്ങള് ടണ് കണക്കിന് നീക്കം ചെയ്തിട്ടുമുണ്ട്. ഇതിനെല്ലാം ഒരു മനുഷ്യന്റെ തിരോധാനം വേണ്ടി വന്നു എന്നത് സങ്കടകരമാണെന്നും അദ്ദേഹം പറഞ്ഞു.
മഴക്കാല പൂര്വ ശുചീകരണത്തില് സര്ക്കാര് ദയനീയമായി പരാജയപ്പെട്ടെന്ന് പ്രതിപക്ഷം നിയമസഭയില് ചൂണ്ടിക്കാട്ടിയപ്പോള് തദ്ദേശ മന്ത്രി പരിഹസിക്കുകയായിരുന്നു. അലക്കിത്തേച്ച വടിവൊത്ത വാക്കുകള് കൊണ്ട് പ്രതിപക്ഷത്തെ പരിഹസിച്ച തദ്ദേശ മന്ത്രിയോട് ചോദിക്കാനുള്ളത്, നിങ്ങള് എന്തു ചെയ്യുകയായിരുന്നു ഇത്ര നാള് എന്നതാണ്. റെയില്വെയും കോര്പറേഷനും തമ്മിലുള്ള തര്ക്കമാണെന്നാണ് പറയുന്നത്. റെയില്വെ പറയുന്നു കോര്പറേഷന് ചെയ്യണമെന്ന്. കോര്പറേഷന് പറയുന്നു റെയില്വെയാണ് ചെയ്യേണ്ടതെന്ന്. റെയില്വെയും കോര്പറേഷനും തമ്മില് തര്ക്കമുണ്ടായാല് അതു പരിഹരിക്കാനല്ലേ ഒരു സര്ക്കാരുള്ളത്. രണ്ട് കൂട്ടരുടെയും യോഗം വിളിച്ച് പരിഹാരത്തിന് മുന്കൈ എടുക്കേണ്ടത് സര്ക്കാരായിരുന്നു. എന്നാല് സര്ക്കാര് അതിന് തയാറായില്ല. ഈ കെടുകാര്യസ്ഥതയാണ് എല്ലായിടത്തും കാണുന്നതെന്നും വിഡി സതീശന് വിമര്ശിച്ചു.
മഴക്കാല പൂര്വ ശുചീകരണം പരാജയപ്പെട്ടതിനാല് എവിടെ മഴ പെയ്താലും വെള്ളം കെട്ടി നില്ക്കുകയാണ്. പകര്ച്ചവ്യാധികള് വ്യാപകമാകുന്നു. ശുദ്ധജല വിതരണത്തില് വലിയ പാളിച്ചകളുണ്ടായി. പെരുമ്പാവൂരില് പത്ത് ദിവസം ആശുപത്രിയില് കിടന്ന അഞ്ജന എന്ന സ്ത്രീ മഞ്ഞപ്പിത്തം ബാധിച്ച് മരിച്ചു. ആ പ്രദേശത്ത് മുഴുവന് രോഗം വ്യാപിക്കുകയാണ്. സംസ്ഥാനത്ത് ഇതുവരെ കേള്ക്കാത്ത രോഗങ്ങള് പടര്ന്നു പിടിക്കുകയാണ്. സര്ക്കാരും തദ്ദേശ വകുപ്പും ആരോഗ്യവകുപ്പും ഒരു ഏകോപനവുമില്ലാതെ നോക്കുകുത്തിയായി നില്ക്കുകയാണ്. സങ്കടകരമായ അവസ്ഥയാണ് സംസ്ഥാനത്ത്. കെടുകാര്യസ്ഥത കൊണ്ട് നിഷ്ക്രിയമായ ഒരു സര്ക്കാരിന്റെ പ്രവര്ത്തനം സാധാരണക്കാരന്റെ ജീവിതത്തെ എത്രത്തോളം ദുസഹമാക്കിയെന്നതിന്റെ ഏറ്റവും ഒടുവിലത്തെ തെളിവാണ് ഇപ്പോള് കാണുന്നത്. തിരുവനന്തപുരം നഗരത്തിലെ ഒരു പ്രദേശത്ത് പത്ത് ദിവസമാണ് വെള്ളം കെട്ടിക്കിടന്നത്. മഞ്ഞപ്പിത്തവും കോളറയും ഉള്പ്പെടെയുള്ള രോഗങ്ങള് പകരുകയാണ്. മന്ത്രി അലക്കിത്തേച്ച വടിവൊത്ത വാക്കുകള് കൊണ്ട് മറുപടി പറയുമ്പോള് ആ അലക്കിത്തേപ്പ് ഇവിടെയില്ല. ഇവിടെ മാലിന്യക്കൂമ്പാരമാണ്. ഇപ്പോള് ചെയ്യുന്ന പണിയൊക്കെ നേരത്തെയും ചെയ്യാമായിരുന്നല്ലോ? യോഗം വിളിച്ചാല് ശുചീകരണമാകില്ല. റെയില്വെയുടേത് അല്ലാതെയുള്ള സ്ഥലത്ത് ശുചീകരണം നടന്നിട്ടുണ്ടോ? റെയില്വെയുടെ മാത്രം മാലിന്യമല്ല ആമയിഴഞ്ചാന് തോട്ടിലേക്ക് എത്തുന്നത്. കേരളത്തില് ഒരിടത്തും മഴക്കാല പൂര്വശുചീകരണം നടന്നിട്ടില്ലെന്നും വിഡി സതീശന് പറഞ്ഞു.
