തിരുവനന്തപുരം മെഡിക്കല് കോളേജിലെ ലിഫ്റ്റില് രോഗി രണ്ട് ദിവസം കുടുങ്ങിക്കിടന്ന സംഭവത്തില് മൂന്ന് പേര്ക്ക് സസ്പെന്ഷന്. രണ്ട് ലിഫ്റ്റ് ഓപ്പറേറ്റര്മാര്, ഡ്യൂട്ടി സാര്ജന്റ് എന്നിവരെയാണ് അന്വേഷണവിധേയമായി സസ്പെന്ഡ് ചെയ്തത്. സംഭവത്തില് അടിയന്തരമായി അന്വേഷിച്ച് നടപടി സ്വീകരിക്കണമെന്ന് ആരോഗ്യ വകുപ്പ് മന്ത്രി വീണാ ജോര്ജ് മെഡിക്കല് വിദ്യാഭ്യാസ വകുപ്പ് ഡയറക്ടര്ക്ക് നിര്ദേശം നല്കിയിരുന്നു. മെഡിക്കല് വിദ്യാഭ്യാസ വകുപ്പ് ജോ. ഡയറക്ടര്, പ്രിന്സിപ്പല്, സൂപ്രണ്ട് എന്നിവരടങ്ങിയ സംഘം നടത്തിയ അന്വേഷണത്തെ തുടര്ന്നാണ് നടപടി.
ശനിയാഴ്ച നടുവേദനയുടെ ചികിത്സയ്ക്കായി എത്തിയ രവീന്ദ്രന് എന്ന രോഗിയാണ് ലിഫിറ്റില് കുടുങ്ങിയത്. സിപിഐ തിരുമല ലോക്കല് സെക്രട്ടറിയാണ് രവി. ഇന്ന് രാവിലെ ലിഫ്റ്റ് ഓപ്പറേറ്റര് എത്തിയപ്പോഴായിരുന്നു രവി ലിഫ്റ്റില് കുടുങ്ങിയ വിവരം അറിഞ്ഞത്. സൂപ്രണ്ട് ഓഫീസിലെ ഒപി ബ്ലോക്കില് ലിഫ്റ്റിലാണ് കുടുങ്ങിയത്. രവിയെ മെഡിക്കല് കോളേജ് ആശുപത്രിയില് പ്രവേശിപ്പിച്ചിരിക്കുകയാണ്.
