അമരാവതി: രണ്ട് ദിവസമായി പെയ്യുന്ന കനത്ത മഴയില് ആന്ധ്രാപ്രദേശില് പത്ത് മരണം. അഞ്ച് ജില്ലകളിലെ 294 ഗ്രാമങ്ങളില് നിന്ന് 13,227 പേരെ മാറ്റിപ്പാര്പ്പിച്ചതായി ആന്ധ്രാപ്രദേശ് ആഭ്യന്തര മന്ത്രി വംഗലപ്പുടി അനിത അറിയിച്ചു. പ്രദേശത്തെ ദുരിതബാധിതരെ പുനരധിവാസ കേന്ദ്രങ്ങളിലേക്ക് മാറ്റിയിട്ടുണ്ട്. അയല്സംസ്ഥാനമായ തെലങ്കാനയിലും കനത്ത മഴ തുടരുകയാണ്. കനത്ത മഴയെത്തുടര്ന്ന് 99 ട്രെയിനുകള് റദ്ദാക്കി. നാലെണ്ണം ഭാഗികമായി റദ്ദാക്കി. 54 എണ്ണം വഴി തിരിച്ചുവിട്ടു.
മുഖ്യമന്ത്രി എന് ചന്ദ്രബാബു നായിഡു മുതിര്ന്ന ഉദ്യോഗസ്ഥരുമായി കാലാവസ്ഥാ സ്ഥിതിഗതികള് അവലോകനം ചെയ്യുകയും വെള്ളപ്പൊക്കം വിലയിരുത്താനും അതിനനുസരിച്ച് ദുരിതാശ്വാസ പ്രവര്ത്തനങ്ങള് ആസൂത്രണം ചെയ്യാനും ഡ്രോണുകള് പോലുള്ള സാങ്കേതികവിദ്യകള് ഉള്പ്പെടുത്താന് അവരോട് ആവശ്യപ്പെട്ടു.
62,644 ഹെക്ടര് നെല്വിളകളും 7,218 ഹെക്ടര് തോട്ടങ്ങളും വെള്ളത്തിനടിയിലായതായി പ്രാഥമിക കണക്കുകള് ഉദ്ധരിച്ച് അനിത പറഞ്ഞു. കൂടാതെ, സ്ഥിതിഗതികള് നിരീക്ഷിക്കാന് നോഡല് ഓഫീസര്മാരെ നിയമിക്കുന്നതിനൊപ്പം എല്ലാ ജില്ലകളിലും കമാന്ഡ് ആന്ഡ് കണ്ട്രോള് റൂമുകളും ടോള് ഫ്രീ നമ്പറുകളും സജ്ജീകരിച്ചിട്ടുണ്ട്. ചിലയിടങ്ങളില് 27 സെന്റീമീറ്റര് വരെ മഴ ലഭിച്ചിട്ടുണ്ട്.
