തിരുവനന്തപുരം: ഹേമ കമ്മിറ്റിക്ക് മൊഴി നല്കിയവരുടേയെല്ലാം സ്വകാര്യത ഉറപ്പു വരുത്തണമെന്ന് മുഖ്യമന്ത്രി പിണറായി വിജയനോട് ആവശ്യപ്പെട്ട് ഡബ്ല്യൂസിസി. ഓഫീസിലെത്തി കണ്ടാണ് ഈ ആവശ്യം ഉന്നയിച്ചത്. സിനിമ മേഖലയില് ചൂഷണത്തിന് വിധേയരായ സ്ത്രീകളുടെ സ്വകാര്യത ലംഘിക്കപ്പെടരുതെന്ന് അഞ്ചംഗ പ്രതിനിധികള് മുഖ്യമന്ത്രിയോട് ആവശ്യപ്പെട്ടു. വനിതകള്ക്ക് ലൊക്കേഷനില് സൗകര്യം ഉറപ്പാക്കണമെന്നും ഹേമ കമ്മിറ്റി സിനിമാ മേഖലയില് നടപ്പാക്കാന് നിര്ദ്ദേശിച്ച ശുപാര്ശകള് നടപ്പാക്കണമെന്നും അവര് കൂട്ടിച്ചേര്ത്തു.
മലയാള സിനിമ മേഖലയില് പെരുമാറ്റച്ചട്ടം നടപ്പാക്കണമെന്ന് നേരത്തെ തന്നെ ഡബ്ലുസിസി ആവശ്യപ്പെട്ടിരുന്നു. സിനിമയിലെ എല്ലാ തൊഴിലുകള്ക്കും കൃത്യമായ കരാര് കൊണ്ടു വരണമെന്നും ലൈംഗികാതിക്രമങ്ങള് തടയാനുളള വ്യവസ്ഥകളും കരാറിന്റെ ഭാഗമാക്കണമെന്നും സംഘടനയ്ക്ക് നിലപാടുണ്ട്. സിനിമ മേഖലയുടെ സമഗ്ര പുനര്നിര്മാണത്തിന് പുതിയ നിര്ദേശങ്ങളടങ്ങിയ പരമ്പര പ്രഖ്യാപിക്കുമെന്ന് ഡബ്ലുസിസി നേരത്തെ അറിയിച്ചിരുന്നു. ഈ പരമ്പരയിലെ ആദ്യ നിര്ദേശമെന്ന നിലയിലാണ് തൊഴില് കരാര് ആവശ്യം ഉന്നയിച്ച് നേരത്തെ ഡബ്ല്യുസിസി രംഗത്ത് വന്നത്.
