കണ്ണൂര്: തെറ്റുപറ്റിയെന്ന് എഡിഎം നവീന് ബാബു പറഞ്ഞതായി കലക്ടര് അരുണ് കെ വിജയന് നലകിയ മൊഴി കോടതി തള്ളി. പി പി ദിവ്യയുടെ മുന്കൂര് ജാമ്യഹര്ജി തള്ളിയുള്ള വിധിന്യായത്തിന്റെ 34-ാം പേജിലാണ് കലക്ടറുടെ മൊഴി പരാമര്ശിക്കുന്നത്. തനിക്ക് തെറ്റി പറ്റിയെന്ന് എഡിഎം നവീന് ബാബു പറഞ്ഞതായാണ് മൊഴി. എന്നാല് തെറ്റുപറ്റിയെന്നു പറയുന്നത് കൈക്കൂലിയോ മറ്റെന്തെങ്കിലും അഴിമതിയോ നടത്തിയതായുള്ള സമ്മതമാണെന്ന് കരുതാനാവില്ലെന്ന് കോടതി വ്യകത്മാക്കി കലക്ടറുടെ മൊഴി തള്ളി.
ഇത്തരത്തില് കലക്ടര് മൊഴി നല്കിയത് വാദത്തിനിടെ ദിവ്യയുടെ അഭിഭാഷകന് കെ വിശ്വന് ആണ് ഉന്നയിച്ചത്. യാത്രയയപ്പു യോഗത്തിനു ശേഷം എഡിഎമ്മിനെ കണ്ടിരുന്നോ എന്ന് മാധ്യമങ്ങള് പലവട്ടം ചോദിച്ചിരുന്നുവെങ്കിലും കലക്ടര് മറുപടി നല്കിയിരുന്നില്ല. ഇങ്ങനെയൊരു കൂടിക്കാഴ്ച നടന്നതായി എഡിഎമ്മിന്റെ മരണശേഷം സര്ക്കാരിനു കലക്ടര് തന്നെ സമര്പ്പിച്ച പ്രാഥമിക റിപ്പോര്ട്ടിലോ കലക്ടറുടെ ഉള്പ്പെടെ മൊഴിയെടുത്ത് ലാന്ഡ് റവന്യു ജോയിന്റ് കമ്മിഷണര് പി ഗീത നല്കിയ റിപ്പോര്ട്ടിലോ പറയുന്നില്ല. ഇതിനെല്ലാം ശേഷമാണ് പൊലീസ് കലക്ടറുടെ മൊഴിയെടുത്തത്.
