കൊച്ചി: ഒരു വര്ഷത്തോളം വിദ്യാര്ഥിനിയെ പീഡിപ്പിച്ച കേസില് മദ്രസ അധ്യാപകന് 70 വര്ഷം കഠിനതടവും 1,15,000 രൂപ പിഴയും. പട്ടിമറ്റം കുമ്മനോട് തയ്യില് വീട്ടില് ഷറഫുദ്ദീ(27)നെയാണ് പെരുമ്പാവൂര് അതിവേഗ പോക്സോ കോടതി ശിക്ഷിച്ചത്. മദ്രസയില് വെച്ചും മദ്രസയുടെ ടെറസിന്റെ മുകളില് വെച്ചും അധ്യാപകന് നിരന്തരമായി പെണ്കുട്ടിയെ പീഡിപ്പിക്കുകയായിരുന്നു. നിരവധി തവണ പ്രതി പീഡിപ്പിച്ചെന്നാണ് പെണ്കുട്ടിയുടെ മൊഴി. 2021 നവംബര് മുതല് 2022 ഫെബ്രുവരി വരെയുള്ള കാലയളവിലായിരുന്നു സംഭവം.
പെണ്കുട്ടി പഠിക്കുന്ന സ്കൂളില് കൗമാരക്കാര് നേരിടുന്ന പ്രശ്നങ്ങളെക്കുറിച്ച് ചോദിച്ചപ്പോഴാണ് വിവരം പുറത്തറിഞ്ഞത്. പിന്നീട് അധ്യാപിക പൊലീസില് വിവരമറിയിക്കുകയായിരുന്നു. 2022 ഫെബ്രുവരി 24ന് പ്രതിയെ അറസ്റ്റ് ചെയ്ത് റിമാന്ഡ് ചെയ്തു. അഞ്ചുവകുപ്പുകളിലാണ് പ്രതിയെ കോടതി ശിക്ഷിച്ചത്. മൂന്ന് വകുപ്പുകളില് 20 വര്ഷം വീതവും രണ്ടുവകുപ്പുകളില് അഞ്ചുവര്ഷം വീതവുമാണ് ശിക്ഷ. പ്രതിയെ വിയ്യൂര് സെന്ട്രല് ജയിലിലേക്ക് മാറ്റി.
