ന്യൂഡല്ഹി: ഡിപിഎസ് ആര്കെ പുരം, പശ്ചിമ വിഹാറിലെ ജിഡി ഗോയങ്ക സ്കൂള് എന്നിവയുള്പ്പെടെ ഡല്ഹിയിലെ 40 ലധികം സ്കൂളുകള്ക്ക് തിങ്കളാഴ്ച രാവിലെ ഇമെയില് വഴി ബോംബ് ഭീഷണി. സംഭവത്തിനു പിന്നാലെ വിദ്യാര്ത്ഥികളെയും ജീവനക്കാരെയും വേഗത്തില് ഒഴിപ്പിച്ചു. ഡല്ഹി ഫയര് ഡിപ്പാര്ട്ട്മെന്റിന് രാവിലെ 6:15ന് ജിഡി ഗോയങ്ക സ്കൂളില് നിന്ന് ആദ്യ അലേര്ട്ട് ലഭിച്ചു, തുടര്ന്ന് 7:06ന് ഡിപിഎസ് ആര്കെ പുരത്ത് നിന്ന് രണ്ടാമത്തെ കോളും ലഭിക്കുകയായിരുന്നു.
മുന്കരുതല് നടപടിയെന്ന നിലയില് വിദ്യാര്ത്ഥികളെ വീട്ടിലേക്ക് അയച്ചു. സംഭവം നഗരത്തിലെ വിദ്യാഭ്യാസ സ്ഥാപനങ്ങളിലെ സുരക്ഷയെക്കുറിച്ചുള്ള ആശങ്കകള് വര്ദ്ധിപ്പിച്ചു. ഇത്തരം ഭീഷണികള് ഡല്ഹിയിലെ സ്കൂളുകളെ തടസ്സപ്പെടുത്തുന്നത് ഇതാദ്യമല്ല. ഒക്ടോബറില്, രോഹിണിയിലെ പ്രശാന്ത് വിഹാറിലെ സിആര്പിഎഫ് സ്കൂളിന് പുറത്തുണ്ടായ സ്ഫോടനത്തില് സ്കൂള് മതിലിനും സമീപത്തെ കടകള്ക്കും വാഹനങ്ങള്ക്കും കേടുപാടുകള് സംഭവിച്ചിരുന്നു.
