കാസര്കോട്: പെരിയ ഇരട്ടക്കൊലപാതക കേസില് 14 പ്രതികള് കുറ്റക്കാരെന്ന് കണ്ടെത്തി. ശിക്ഷിക്കപ്പെട്ട പതിനാല് പ്രതികളില് സിപിഐഎം മുന് എംഎല്എ കെ വി കുഞ്ഞിരാമനടക്കമുണ്ട്. പത്ത് പ്രതികളെ കുറ്റവിമുക്തരാക്കി. 9,11, 12, 13, 16, 18, 17, 19, 23, 24 എന്നീ പ്രതികളെയാണ് കുറ്റവിമുക്തരാക്കിയത്. സിപിഐഎം മുന് ലോക്കല് കമ്മിറ്റി അംഗം പീതാംബരനാണ് കേസിലെ ഒന്നാം പ്രതി. സിബിഐ കോടതിയാണ് കേസില് വിധി പ്രസ്താവിച്ചത്. കൂടാതെ ഇതില് ആറ് പേര് സിപിഐഎമ്മിന്റെ സജീവ പ്രവര്ത്തകരോ പാര്ട്ടി ചുമതലകളില് ഉണ്ടായിരുന്നവരോ ആണ്.
പീതാംബരന് (മുന് പെരിയ എല്സി അംഗം), സജി സി. ജോര്ജ് (സജി), കെ.എം. സുരേഷ്, കെ. അനില് കുമാര് (അബു), ജിജിന്, ആര്. ശ്രീരാഗ് (കുട്ടു), എ. അശ്വിന് (അപ്പു), സുബീഷ് (മണി), എ. മുരളി, രഞ്ജിത്ത് (അപ്പു), കെ. മണികണ്ഠന് (ഉദുമ മുന് ഏരിയ സെക്രട്ടറി, കാഞ്ഞങാട് ബ്ലോക്ക് പഞ്ചായത്ത് പ്രസിഡന്റ്), എ. സുരേന്ദ്രന് (വിഷ്ണു സുര), കെ.വി. കുഞ്ഞിരാമന് (ഉദുമ കുഞ്ഞിരാമന്)(മുന് എംഎല്എ, സിപിഎം ജില്ലാ സെക്രട്ടേറിയറ്റ് അംഗം), രാഘവന് വെളുത്തോളി (രാഘവന് നായര്) (മുന് പാക്കം ലോക്കല് സെക്രട്ടറി), കെ. വി. ഭാസ്കരന് എന്നിവരുള്പ്പടെയുള്ളവരെയാണ് കുറ്റക്കാരെന്ന് കണ്ടെത്തിയത്.
2019 ഫെബ്രുവരി 17ന് നടന്ന സംഭവത്തിലാണ് വിധി. കോണ്ഗ്രസ് പ്രവര്ത്തകരായ ശരത് ലാല്, കൃപേഷ് എന്നിവരെ വെട്ടിക്കൊലപ്പെടുത്തിയെന്നതാണ് കേസ്. മുന് എംഎല്എ കെ.വി കുഞ്ഞിരാമനും സിപിഎം നേതാക്കളുമടക്കം 24 പേരായിരുന്നു കേസില് പ്രതിപട്ടികയിലുണ്ടായത്. കൊലപാതകം, ഗൂഢാലോചന, തെളിവ് നശിപ്പിക്കല് ഉള്പ്പെടെയുള്ള കുറ്റങ്ങളാണ് തെളിഞ്ഞത്.
