ഉഡുപ്പി: ഉഡുപ്പിയില് അടുത്തിടെ ഒരു സ്ത്രീയെയും മൂന്ന് കുട്ടികളെയും കൊലപ്പെടുത്തിയ കേസിലെ പ്രതിയായ പ്രവീണ് ചൗഗാലെ (39) മഹാരാഷ്ട്രയിലെ പൂനെയില് മൂന്ന് മാസം പോലീസുകാരനായി ജോലി ചെയ്തിട്ടുണ്ടെന്ന് ഉഡുപ്പി പോലീസിന്റെ അന്വേഷണത്തില് കണ്ടെത്തി.
ഉഡുപ്പിയിലെ കൂട്ടക്കൊലയുമായി ബന്ധപ്പെട്ട് ചൊവ്വാഴ്ച കുടച്ചിയില് വച്ചാണ് ചൗഗാലെയെ പോലീസ് കസ്റ്റഡിയിലെടുത്ത് ഉഡുപ്പി പോലീസ് ചോദ്യം ചെയ്തത്. സിവില് പൊലീസ് ഡിപ്പാര്ട്ട്മെന്റില് ജോലി ചെയ്തിരുന്നോയെന്ന് പൊലീസ് പരിശോധിച്ചു വരികയാണെന്ന് ഉഡുപ്പി ജില്ലാ പൊലീസ് സൂപ്രണ്ട് ഡോ. കെ. അരുണ് നേരത്തെ മാധ്യമപ്രവര്ത്തകരോട് പറഞ്ഞിരുന്നു.
മൂന്ന് മാസത്തോളം മഹാരാഷ്ട്ര പോലീസില് ജോലി ചെയ്ത ശേഷം മംഗളൂരുവില് എയര് ഇന്ത്യയില് ചേരാന് ചൗഗലെ രാജിവെച്ചതായി അന്വേഷണത്തില് പോലീസ് കണ്ടെത്തി. കഴിഞ്ഞ കുറേ വര്ഷങ്ങളായി മംഗളൂരുവില് എയര് ഇന്ത്യയുടെ ക്യാബിന് ക്രൂ അംഗമായി ജോലി ചെയ്യുകയായിരുന്നു ചൗഗലെ.
ഒരു കുടുംബത്തിലെ നാല് പേരെ ഇയാള് വീട്ടില് കയറി കുത്തിക്കൊലപ്പെടുത്തുകയായിരുന്നു. ഹസീനയും മക്കളായ അഫ്നാന്, ഐനാസ്, അസിം എന്നിവരും ഞായറാഴ്ച രാവിലെ കുത്തേറ്റു മരിച്ചു. ഹസീനയുടെ ഭര്തൃമാതാവ് ഹാജിറ ആക്രമിക്കപ്പെട്ടിരുന്നുവെങ്കിലും ടോയ്ലറ്റില് പൂട്ടിയിട്ട് മരണത്തില് നിന്ന് രക്ഷപ്പെട്ടു.
