തൃശൂര്: തദ്ദേശതെരഞ്ഞെടുപ്പിന്റെ ഭാഗമായി തൃശ്ശൂര്-എറണാകുളം ജില്ലാ അതിര്ത്തികളിലുള്ള കള്ളുഷാപ്പുകള് ഉള്പ്പെടെയുള്ള മദ്യശാലകള് തുടര്ച്ചയായി അഞ്ചു ദിവസം പ്രവര്ത്തിക്കില്ല. വോട്ടെടുപ്പ് നടക്കുന്ന പരിധിയുടെ അഞ്ചു കിലോമീറ്റര് ചുറ്റളവില് മദ്യവില്പ്പന നിരോധിക്കുന്നതിനാലാണിത്.
എറണാകുളം വരെയുള്ള ജില്ലകളില് ഡിസംബര് ഒന്പതിനാണ് തെരഞ്ഞെടുപ്പ്. ഇവിടെ ഏഴിന് വൈകീട്ട് ആറ് മുതല് വോട്ടെടുപ്പ് കഴിയുന്നതുവരെ ഡ്രൈഡേയാണ്. ഈ ദിവസങ്ങളില് അഞ്ചുകിലോമീറ്റര് പരിധിയിലുള്ള തൃശ്ശൂര് ജില്ലയിലെ കള്ളുഷാപ്പുകളും ബാര് ഉള്പ്പെടെയുള്ളവയും അടച്ചിടേണ്ടിവരും.
11-ന് വോട്ടെടുപ്പ് നടക്കുന്ന തൃശ്ശൂര് ഉള്പ്പെടെയുള്ള വടക്കന് ജില്ലകളില് ഒന്പതിന് വൈകീട്ട് ആറ് മുതല് വോട്ടെടുപ്പ് കഴിയുന്നതുവരെയാണ് ഡ്രൈഡേ. ഈ ദിവസങ്ങളില് എറണാകുളം ജില്ലയിലെ അതിര്ത്തികളിലുള്ള മദ്യശാലകളും അടച്ചിടേണ്ടി വരും.
