ഭോപ്പാല്: മധ്യപ്രദേശിലെ ഭിന്ദ് ജില്ലയിലെ ആറ്റര് അസംബ്ലി മണ്ഡലത്തിലെ ഒരു ബൂത്തില് നവംബര് 21 ന് റീപോളിംഗ് നടത്താന് ഇന്ത്യന് തിരഞ്ഞെടുപ്പ് കമ്മീഷന് ഉത്തരവിട്ടതായി ഔദ്യോഗിക അറിയിപ്പ്. നവംബര് 17 ന് കിശുപുരയിലെ ബന്ധപ്പെട്ട ബൂത്തില് ചിലര് വോട്ട് ചെയ്യുന്നതിന്റെ വീഡിയോ ഷൂട്ട് ചെയ്തതിനാല് രഹസ്യസ്വഭാവം ലംഘിച്ചതിനാലാണ് റീപോളിംഗ് നടത്താന് ഉത്തരവിട്ടതെന്ന് ജില്ലാ ഉദ്യോഗസ്ഥന് പറഞ്ഞു.
രഹസ്യസ്വഭാവം ലംഘിച്ചതിന് പോളിംഗ് ടീമിലെ നാല് പേരെ സസ്പെന്ഡ് ചെയ്തതായി ജില്ലാ കളക്ടറും റിട്ടേണിംഗ് ഓഫീസറുമായ സഞ്ജീവ് ശ്രീവാസ്തവ അറിയിച്ചു. നാളെ കിശുപുരയിലെ പോളിംഗ് സെന്റര് നമ്പര് 71 ന് കീഴിലുള്ള മൂന്നാം നമ്പര് ബൂത്തില് രാവിലെ 7 നും വൈകിട്ട് 6 നും ഇടയില് വോട്ടെടുപ്പ് നടക്കുമെന്നും വോട്ടര്മാരുടെ നടുവിരലില് മായാത്ത മഷി പുരട്ടുമെന്നും അറിയിപ്പില് പറയുന്നു.
റീപോളിംഗിന്റെ ഉത്തരവ് ജില്ലാ റിട്ടേണിംഗ് ഓഫീസര്ക്ക് നല്കിയിട്ടുണ്ട്. റീപോളിംഗ് സമയത്ത് വോട്ടര്മാരെ മൊബൈല് ഫോണുമായി ബൂത്തില് പ്രവേശിക്കാന് അനുവദിക്കില്ലെന്നും മാതൃകാ പെരുമാറ്റച്ചട്ടം സംബന്ധിച്ച മറ്റെല്ലാ നിയമങ്ങളും പാലിക്കുമെന്നും ശ്രീവാസ്തവ പറഞ്ഞു. റീപോളിംഗ് നടപടികള് വീഡിയോയില് പകര്ത്തുമെന്നും അദ്ദേഹം പറഞ്ഞു.
