28-ാമത് കേരള രാജ്യാന്തര ചലച്ചിത്രമേളയുടെ നാലാം ദിനമായ ഇന്ന് 14 തിയറ്ററുകളിലായി 69 സിനിമകള് പ്രദര്ശിപ്പിക്കും. വേള്ഡ് മൂവി വിഭാഗത്തില് നിന്നുള്ള 26 ചിത്രങ്ങളും രാജ്യാന്തര മത്സര വിഭാഗത്തില് നിന്നുള്ള നാല് ചിത്രങ്ങളും പ്രദര്ശിപ്പിക്കും. മത്സര വിഭാഗത്തിന് കീഴില് ലീല അവില്സ് സംവിധാനം ചെയ്ത ടോട്ടം പ്രദര്ശിപ്പിക്കും. ഇന്ന് മലയാള സിനിമയില് നിന്ന് ആറ് സിനിമകളും ഇന്ത്യന് സിനിമ നൗവില് നിന്ന് നാല് സിനിമകളും പ്രദര്ശിപ്പിക്കും. 41 റിപ്പീറ്റ് സ്ക്രീനിംഗുകളും ഉണ്ടാകും.
ഐഎഫ്എഫ്കെയുടെ മൂന്നാം ദിവസമായ ഇന്നലെ തിയേറ്ററുകളിലേക്ക് വന് ജനക്കൂട്ടം ഒഴുകിയെത്തിയതോടെ തിരുവനന്തപുരം സജീവമായി. കേരളത്തില് നിന്ന് മാത്രമല്ല, രാജ്യത്തിന്റെ വിവിധ ഭാഗങ്ങളില് നിന്നുമുള്ള ആളുകളെത്തി. ഒന്നിലധികം പ്രദര്ശനങ്ങളിലേക്കും ചര്ച്ചാ വേദികളിലേക്കും ആകാംക്ഷയോടെ നീങ്ങുന്ന ചലച്ചിത്ര പ്രേമികളുടെ ഉജ്ജ്വലമായ കാഴ്ച സൃഷ്ടിച്ചു.
മലയാളത്തില് നിന്നുള്ള കാതല് ദി കോര് എന്ന സിനിമയ്ക്ക് വന് സ്വീകരണമാണ് ലഭിച്ചത്. മേളയില് സിനിമയുടെ ആദ്യ പ്രദര്ശനത്തിനുള്ള റിസര്വേഷന് മിനിറ്റുകള്ക്കകമാണ് നിറഞ്ഞത്. റിസര്വേഷന് ചെയ്യാത്തവര്ക്കായി അനുവദിച്ചിട്ടുള്ള 30 ശതമാനം സീറ്റുകളിലേക്ക് ഡെലിഗേറ്റുകള് ഒഴുകിയെത്തി. തിരക്കു കാരണം വൈകിയാണ് സിനിമ തുടങ്ങിയത്. തിയ്യറ്റര് നിറഞ്ഞതോടെ പലരും നിരാശരായി മടങ്ങി. തുടര്ന്ന് സംഘാടകരുമായി വാക്കുതര്ക്കത്തില് ഏര്പ്പെട്ടു.
