തിരുവനന്തപുരം: സംസ്ഥാനത്ത് പ്രതിദിനം ഒരു കേന്ദ്രത്തില് 50പേരുടെ ഡ്രൈവിങ് ടെസ്റ്റ് നടത്തിയാല് മതിയെന്ന പുതിയ നിയന്ത്രണം പിന്വലിച്ച് ഗതാഗതമന്ത്രി കെ ബി ഗണേഷ് കുമാര്. നിയന്ത്രണത്തിനെതിരെ സംസ്ഥാനത്തൊട്ടാകെ വ്യാപക പ്രതിഷേധമാണ് ഉയര്ന്നത്. ഇന്ന് ഡ്രൈവിങ് ടെസ്റ്റിന് സ്ലോട്ട് ലഭിച്ചവര്ക്കെല്ലാം ടെസ്റ്റ് നടത്താനും ഗണേഷ് കുമാര് നിര്ദേശിച്ചു.
നിലവില് പ്രതിദിനം 160 ടെസ്റ്റുകള് നടത്തുന്നുണ്ട്. മെയ് 5 മുതല് നടപ്പിലാക്കാനിരിക്കുന്ന പരിഷ്ക്കരണത്തിന്റെ ഭാഗമാണ് പുതിയ നിയന്ത്രണങ്ങളെന്നാണ് ഗതാഗത വകുപ്പ് വ്യക്തമാക്കുന്നത്. പുതിയ തീരുമാനത്തില് പ്രതിഷേധവുമായി ഡ്രൈവിങ് സ്കൂള് ജീവനക്കാര് രംഗത്തെത്തിയിരുന്നു.
ഇന്നലെയാണ് ഡ്രൈവിങ് ടെസ്റ്റുകള്ക്ക് നിയന്ത്രണം ഏര്പ്പെടുത്തി കൊണ്ട് ഗണേഷ് കുമാറിന്റെ നിര്ദേശം വന്നത്. ഇന്ന് വിവിധ കേന്ദ്രങ്ങളില് ടെസ്റ്റിന് എത്തിയവരോട് 50 പേര്ക്ക് മാത്രമേ ടെസ്റ്റ് നടത്തുകയുള്ളൂ എന്ന് മോട്ടോര് വാഹന വകുപ്പ് ഉദ്യോഗസ്ഥര് പറഞ്ഞു. ഇതാണ് പ്രതിഷേധത്തില് കലാശിച്ചത്. നിയന്ത്രണം നടപ്പാക്കിയാല് ഇന്ന് സ്ലോട്ട് കിട്ടിയ പലര്ക്കും മടങ്ങിപ്പോകേണ്ടി വരും.
