ദില്ലി: കുവൈത്തില് തൊഴിലാളികളെ പാര്പ്പിച്ച കെട്ടിടത്തിലുണ്ടായ ദുരന്തം വീണ്ടും വിലയിരുത്തി പ്രധാനമന്ത്രി നരേന്ദ്രമോദി. മൃതദേഹങ്ങള് പെട്ടെന്ന് തന്നെ നാട്ടിലെത്തിക്കാനുള്ള പ്രവര്ത്തനങ്ങള് നടക്കുന്നുണ്ട്. എന്നാല് മൃതദേഹങ്ങള് പലതും കത്തിക്കരിഞ്ഞ നിലയിലായതിനാല് ഡിഎന്എ പരിശോധന ഫലം കൂടി കിട്ടിയ ശേഷമേ നാട്ടിലെത്തിക്കാനാകൂയെന്ന് വിദേശകാര്യ മന്ത്രാലയം വ്യക്തമാക്കി. വിദേശകാര്യ സഹമന്ത്രി കീര്ത്തി വര്ധന് സിംഗ് കുവൈത്തിലെത്തി. തീപിടിത്തത്തില് 42 ഇന്ത്യക്കാര് ഉള്പ്പെടെ 49 പേര് മരിക്കുകയും നിരവധി പേര്ക്ക് പരിക്കേല്ക്കുകയും ചെയ്തു. അപകടത്തില് മരിച്ചവരില് 24 പേരെങ്കിലും കേരളത്തില് നിന്നുള്ളവരാണ്.
പ്രാഥമിക വിവരം ലഭിച്ച ശേഷം ദില്ലിയില് ഉന്നതതല യോഗം നടക്കും. വിദേശ കാര്യമന്ത്രിയില് നിന്ന് പ്രധാനമന്ത്രി വിവരങ്ങള് തേടിയിരുന്നു. അതേ സമയം, മരിച്ചവരില് ഭൂരിഭാഗവും കേരളത്തില് നിന്നുള്ളവരായതിനാല് സംസ്ഥാന സര്ക്കാരിനെ കൂടി സഹകരിപ്പിച്ചാണ് ദുരിതാശ്വാസ പ്രവര്ത്തനങ്ങള് ഏകോപിപ്പിക്കുന്നത്. ആരോഗ്യമന്ത്രി വീണാ ഡോര്ജും കുവൈറ്റില് എത്തിയിട്ടുണ്ട്. പരിക്കേറ്റവരുടെ പുനരധിവാസമടക്കം കേന്ദ്രസര്ക്കാരിന്റെ ചര്ച്ചകളിലുണ്ട്. കുവൈറ്റ് വിദേശകാര്യമന്ത്രിയുമായി മന്ത്രി എസ് ജയ് ശങ്കര് ചര്ച്ച നടത്തി. ദുരിതാശ്വാസ പ്രവര്ത്തനങ്ങളില് കുവൈറ്റിനെ ഇന്ത്യ നന്ദിയറിയിച്ചു.
