കോഴിക്കോട്: മലപ്പുറം തിരൂര് ഡെപ്യൂട്ടി തഹസില്ദാര് പി ബി ചാലിബിന്റെ തിരോധാനത്തില് വഴിത്തിരിവ്. ചാലിബ് വീട്ടുകാരുമായി ഫോണില് സംസാരിക്കുകയും തിരിച്ചുവരുമെന്ന് പറയുകയും ചെയ്തു. മാനസിക പ്രയാസത്തിലാണ് നാടു വിട്ടതെന്നും, വീട്ടിലേക്ക് തിരിച്ചു വരുമെന്നും ചാലിബ് ഭാര്യയോട് പറഞ്ഞു. കര്ണാടകയിലെ ഉഡുപ്പിയിലാണ് ടവര് ലൊക്കേഷന് എന്നാണ് പോലീസിന് ലഭിച്ച വിവരം.
താന് ഒറ്റയ്ക്കായാണ് ഉള്ളതെന്നും, കൂടെ ആരും ഇല്ലെന്നും ചാലിബ് സൂചിപ്പിച്ചതായി വീട്ടുകാര് പറഞ്ഞു. ചാലിബിനെ കാണാനില്ലെന്ന് കാണിച്ച് ബന്ധുക്കള് കഴിഞ്ഞ ദിവസം തിരൂര് പൊലീസില് പരാതി നല്കിയിരുന്നു. ഇതില് അന്വേഷണം നടക്കുന്നതിനിടെയാണ്, ചാലിബ് വീട്ടിലേക്ക് വിളിച്ചത്. കാണാതായതിന് ശേഷം മൊബൈല് ടവര് ലൊക്കേഷന് ആദ്യം കോഴിക്കോട്ടും, പിന്നീട് ഉഡുപ്പിയിലുമാണ് കണ്ടെത്തിയത്.
ബുധനാഴ്ച വൈകിട്ട് ജോലി കഴിഞ്ഞ് ഇറങ്ങിയതിന് ശേഷമാണ് ചാലിബിനെ കാണാതായത്. ഭാര്യയോട് വീട്ടിലെത്താന് വൈകുമെന്ന് ഫോണില് വിളിച്ച് അറിയിച്ചിരുന്നു. പിന്നീട് വളാഞ്ചേരി ഇരിമ്പിളിയത്ത് ഒരു റെയ്ഡ് ഉണ്ടെന്നും കൂടെ പൊലീസ്, എക്സൈസ് ടീം ഉണ്ടെന്നും വാട്സാപ്പ് സന്ദേശം അയക്കുകയായിരുന്നു. എന്നാല് രാത്രിയേറെ വൈകിയിട്ടും കാണാത്തതിനെ തുടര്ന്ന് തിരൂര് പൊലീസില് പരാതി നല്കുകയായിരുന്നു.
