ന്യൂഡല്ഹി: പീഡനക്കേസില് നടന് സിദ്ദിഖിന് മുന്കൂര് ജാമ്യം അനുവദിച്ച് സുപ്രീംകോടതി. ജസ്റ്റിസുമാരായ ബേല എം ത്രിവേദി, സതീഷ് ചന്ദ്ര ശര്മ്മ എന്നിവരുള്പ്പെട്ട ഡിവിഷന് ബെഞ്ചിന്റേതാണ് വിധി. കേസ് അന്വേഷണവുമായി സിദ്ദിഖ് സഹകരിക്കുക, പാസ്പോര്ട്ട് കോടതിയില് സറണ്ടര് ചെയ്യണം തുടങ്ങിയ ഉപാധികളോടെയാണ് ജാമ്യം അനുവദിച്ചിട്ടുള്ളത്.
അറസ്റ്റ് ചെയ്താല് ജാമ്യത്തില് വിടണമെന്ന് പൊലീസിനും നിര്ദേശം നല്കിയിട്ടുണ്ട്. യുവനടി നല്കിയ പരാതിയുടെ അടിസ്ഥാനത്തിലാണ് കേസ്. പരാതി നല്കാനുണ്ടായ കാലതാമസം നടന് സിദ്ദിഖ് സുപ്രീംകോടതിയില് വീണ്ടും ഉന്നയിച്ചു. സല്പ്പേര് നശിപ്പിക്കുക ലക്ഷ്യമിട്ടുള്ള അപകടകരമായ നീക്കമാണ് പരാതിക്ക് പിന്നിലുള്ളത്. പരാതി സിനിമാ മേഖലയെ തകര്ക്കുക കൂടി ലക്ഷ്യമിട്ടുള്ളതാണ് എന്നും സിദ്ദിഖിന്റെ അഭിഭാഷകനായ മുകുള് റോഹ്തഗി കോടതിയില് പറഞ്ഞു.
