ഡല്ഹി: ഡല്ഹി മുഖ്യമന്ത്രി അരവിന്ദ് കെജ്രിവാളിന്റെ ഇഡി കസ്റ്റഡി റോസ് അവന്യൂ കോടതി ഏപ്രില് 1 വരെ നീട്ടി. മദ്യനയ അഴിമതിയുമായി ബന്ധപ്പെട്ട് മാര്ച്ച് 21നാണ് കെജ്രിവാളിനെ ഇഡി അറസ്റ്റ് ചെയ്തത്. മാര്ച്ച് 28 വരെ ഡല്ഹി മുഖ്യമന്ത്രിയുടെ ഏഴ് ദിവസത്തെ കസ്റ്റഡി അന്വേഷണ ഏജന്സിക്ക് കോടതി നേരത്തെ അനുവദിച്ചിരുന്നു. കെജ്രിവാളിനെ ഇനിയും കസ്റ്റഡിയില് വേണമെന്ന ഇഡിയുടെ ആവശ്യം കോടതി അംഗീകരിക്കുകയായിരുന്നു. ഇഡി കസ്റ്റഡിയെ കെജ്രിവാളും എതിര്ത്തില്ല.
വാദത്തിനിടെ, കെജ്രിവാള് നേരിട്ട് കോടതിയെ അഭിസംബോധന ചെയ്യുകയും ആം ആദ്മി പാര്ട്ടിയെ തകര്ക്കാന് ഇഡി ശ്രമിക്കുകയും ചെയ്തുവെന്നും ഒരു കോടതിയും താന് കുറ്റക്കാരനാണെന്ന് തെളിയിച്ചിട്ടില്ലെന്നും പ്രസ്താവിച്ചു. ഒരു സിറ്റിംഗ് മുഖ്യമന്ത്രിയെ അറസ്റ്റ് ചെയ്യാന് ഇഡി നിസ്സാരമായ കാരണങ്ങള് ഉപയോഗിച്ചെന്ന് അദ്ദേഹം കുറ്റപ്പെടുത്തി. എല്ലാ അംഗീകാരവും നേടിയാണ് മദ്യനയം നടപ്പാക്കിയതെന്ന് കെജ്രിവാള് ഇന്ന് കോടതിയില് പറഞ്ഞു. സിബിഐ കുറ്റപത്രത്തില് താന് പ്രതിയല്ല. സാക്ഷികളെ ഭീഷണിപ്പെടുത്തിയാണ് ഇഡി തനിക്കെതിരെ നടപടിയിലേക്ക് നീങ്ങിയതെന്നും കെജ്രിവാള് പറഞ്ഞു.
