കണ്ണൂര്: കണ്ണൂര് എഡിഎം നവീന് ബാബുവിനെ മരിച്ച നിലയില് കണ്ടെത്തി. പള്ളിക്കുന്നിലെ ക്വാട്ടേഴ്സിലാണ് അദ്ദേഹത്തെ മരിച്ച നിലയില് കണ്ടെത്തിയത്. നവീന്ബാബുവിന്റെ യാത്രയപ്പ് ചടങ്ങില് ഇന്നലെ കണ്ണൂര് ജില്ലാ പഞ്ചായത്ത് പ്രസിഡണ്ട് പി പി ദിവ്യ ഗുരുതരാരോപണം ഉന്നയിച്ചിരുന്നു.
പെട്രോള് പമ്പ് അനുവദിക്കുന്നതുമായി ബന്ധപ്പെട്ട് നവീന് ബാബുവിനെതിരെ അഴിമതി ആരോപണമാണ് ദിവ്യ വേദിയില് ഉയര്ത്തിയത്. ഉദ്യോഗസ്ഥര് സത്യസന്ധരായിരിക്കണമെന്നും നവീന് ബാബു കണ്ണൂരില് പ്രവര്ത്തിച്ചതുപോലെ മറ്റിടങ്ങളില് പ്രവര്ത്തിക്കരുതെന്നും പി പി ദിവ്യ വേദിയില് പറഞ്ഞിരുന്നു.
ജീവിതത്തില് സത്യസന്ധത പാലിക്കണമെന്നും കണ്ണൂരില് നടത്തിയത് പോലെയായിരിക്കരുത് അടുത്ത സ്ഥലത്തെ പ്രവര്ത്തനമെന്നും നവീന്ബാബുവിനെതിരെ പി പി ദിവ്യ പറഞ്ഞിരുന്നു. സര്വ്വീസ് സര്വ്വീസാണ്. ഒരു നിമിഷം മതി. ആ നിമിഷത്തെക്കുറിച്ച് ഓര്ത്തുകൊണ്ട് നമ്മള് എല്ലാവരും കയ്യില് പേന പിടിക്കണം. ഉപഹാരം സമര്പ്പിക്കുന്ന ചടങ്ങില് ഞാന് ഉണ്ടായിരിക്കാന് ആഗ്രഹിക്കുന്നില്ല’, എന്നും പി പി ദിവ്യ കഴിഞ്ഞ ദിവസം സംഘടിപ്പിച്ച യാത്രയയപ്പില് പറഞ്ഞിരുന്നു.
