വിപ്ലവത്തിന്റെ പുതിയ ഡ്രസ് കോഡ് ലോഞ്ചാണോ? ഡിവൈഎഫ്‌ഐ നാടകത്തിന് സോഷ്യൽ മീഡിയയിൽ ട്രോൾമഴ

തൃശൂർ: ഡിവൈഎഫ്‌ഐ സംസ്ഥാന സമ്മേളനത്തോടനുബന്ധിച്ച് തൃശൂർ റീജിയണൽ തിയറ്ററിലെ പുഷ്പൻ നഗറിൽ അവതരിപ്പിച്ച നാടകത്തിലെ ചില രംഗങ്ങളാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്. കേന്ദ്രസർക്കാരിനെ വിമർശിക്കുകയും അഭിപ്രായ സ്വാതന്ത്ര്യത്തിന് ഭരണകൂടങ്ങൾ ഏർപ്പെടുത്തുന്ന നിയന്ത്രണങ്ങളെ പ്രമേയമാക്കുകയും ചെയ്ത നാടകത്തിലെ അവതരണ ശൈലിയും കഥാപാത്രങ്ങളുടെ വേഷവിധാനവുമാണ് ട്രോൾ പേജുകളുടെ പ്രധാന ലക്ഷ്യം.
“ഇത് സംസ്ഥാന സമ്മേളനമാണോ… അതോ വിപ്ലവത്തിന്റെ പുതിയ ഡ്രസ് കോഡ് ലോഞ്ചാണോ?” എന്ന പരിഹാസ ചോദ്യമാണ് സോഷ്യൽ മീഡിയയിൽ ഉയരുന്നത്.
കമ്മ്യൂണിസ്റ്റ് പ്രസ്ഥാനത്തിന്റെ സമ്മേളന വേദികളിൽ സാധാരണയായി തൊഴിലാളി വർഗത്തിന്റെ പോരാട്ടങ്ങളും കർഷക-തൊഴിലാളി സമരങ്ങളുടെ ചരിത്രവും രക്തസാക്ഷിത്വവും വിപ്ലവത്തിന്റെ പ്രതീകങ്ങളുമൊക്കെയാണ് സാംസ്കാരിക പരിപാടികളിൽ നിറയാറുള്ളത്. എന്നാൽ ഇത്തവണത്തെ നാടകത്തിലെ ചില രംഗങ്ങൾ അത്തരമൊരു പതിവ് രാഷ്ട്രീയ അവതരണത്തിൽ നിന്ന് വ്യത്യസ്തമായതോടെയാണ് ട്രോളുകൾക്ക് വഴിയൊരുങ്ങിയത്.
നാടകം പറയുന്ന രാഷ്ട്രീയ സന്ദേശത്തേക്കാൾ നാടകത്തിൽ അത് എങ്ങനെ അവതരിപ്പിച്ചു എന്നതാണ് സോഷ്യൽ മീഡിയയിൽ ചർച്ചയായത്.
അഭിപ്രായ സ്വാതന്ത്ര്യത്തെക്കുറിച്ച് സംസാരിക്കുന്ന നാടകത്തിന് പിന്നാലെ, “അഭിപ്രായം സ്വതന്ത്രം… പക്ഷേ ഡ്രസ് കോഡ് ആരുടേത്?” എന്ന തരത്തിലുള്ള പരിഹാസങ്ങളും ഉയരുന്നുണ്ട്.
ഒരുകാലത്ത് സമ്മേളന വേദികളിൽ “തൊഴിലാളി വർഗത്തിന്റെ മോചനമാണ് ലക്ഷ്യം” എന്ന മുദ്രാവാക്യങ്ങളായിരുന്നു മുഴങ്ങിയിരുന്നതെങ്കിൽ, സോഷ്യൽ മീഡിയയുടെ കാലത്ത് അതിനൊപ്പം മറ്റൊരു ചോദ്യം കൂടി ഉയരുകയാണ്:
“വിപ്ലവം പഴയതുതന്നെയോ, അതോ വിപ്ലവത്തിന്റെ അവതരണ ശൈലിയും അപ്ഡേറ്റ് ചെയ്തോ?”
നാടകത്തിന്റെ രാഷ്ട്രീയ പ്രമേയം ഗൗരവമുള്ളതാണെങ്കിലും, അതിന്റെ അവതരണത്തിലെ ചില ദൃശ്യങ്ങളാണ് ഇപ്പോൾ രാഷ്ട്രീയ സന്ദേശത്തെ മറികടന്ന് വൈറലാകുന്നത്. കോൺഗ്രസ്, ബിജെപി അനുകൂല സൈബർ ഇടങ്ങളിൽ മാത്രമല്ല, പൊതുസോഷ്യൽ മീഡിയയിലും ഇതുമായി ബന്ധപ്പെട്ട പരിഹാസങ്ങളും ട്രോളുകളും പ്രചരിക്കുന്നുണ്ട്.
അതോടെ ഡിവൈഎഫ്‌ഐ സമ്മേളനത്തിന്റെ രാഷ്ട്രീയ ചർച്ചകൾക്കിടയിൽ നാടകത്തിന്റെ “ഡ്രസ് കോഡും” ഒരു രാഷ്ട്രീയ ചർച്ചയായി മാറിയിരിക്കുകയാണ്.
വിപ്ലവം വേദിയിൽ അരങ്ങേറിയോ എന്നത് വേറെ കാര്യം.
പക്ഷേ ട്രോൾ വിപ്ലവം സോഷ്യൽ മീഡിയയിൽ തുടങ്ങിയെന്ന കാര്യത്തിൽ സംശയമില്ല!