വയനാട്: മുണ്ടക്കൈ-ചൂരല്മല ഉരുള്പൊട്ടല് ദേശീയ ദുരന്തമായി പ്രഖ്യാപിക്കാനാവില്ലെന്ന് കേന്ദ്ര സര്ക്കാര്. നിലവിലെ മാനദണ്ഡങ്ങള് അനുസരിച്ച് ദേശീയ ദുരന്തമായി പ്രഖ്യാപിക്കാനാവില്ലെന്ന് ആഭ്യന്തര സഹമന്ത്രി നിത്യാനന്ദ റായ് പ്രതികരിച്ചു. 2024-2025 സാമ്പത്തിക വര്ഷത്തില് കേരളത്തിന് 388 കോടി നല്കിയെന്ന് നിത്യാനന്ദ റായ് പറഞ്ഞു. ഇതില് 291 കോടി കേന്ദ്ര സര്ക്കാരിന്റെ ഫണ്ടില് നിന്നുള്ളതാണ്.
ഇതില് ആദ്യ ഗഡുവായ 145 കോടി രൂപ ഓഗസ്റ്റ് 31 ന് സംസ്ഥാനത്തിന് നല്കിയിരുന്നു. 2024 ഏപ്രില് ഒന്നിലെ കണക്ക് പ്രകാരം സംസ്ഥാനത്തിന്റെ എസ് ഡി ആര് എഫ് ഫണ്ടില് 394 കോടി രൂപ ബാലന്സ് ഉണ്ട്. ദുരന്തം നേരിടാനാവശ്യമായ തുക സംസ്ഥാനത്തിന്റെ പക്കല് ഇപ്പോള് തന്നെയുണ്ടെന്നാണ് ഇതിലൂടെ വ്യക്തമാകുന്നതെന്നും കേന്ദ്രമന്ത്രിയുടെ മറുപടി കത്തിലുണ്ട്.
സംസ്ഥാനം നിവേദനം നല്കും മുമ്പേ കേന്ദ്രം വയനാട്ടിലെത്തി. ദുരന്ത നിവാരണത്തിന്റെ പ്രാഥമിക ഉത്തരവാദിത്തം സംസ്ഥാന സര്ക്കാരിന്. സംസ്ഥാനങ്ങള്ക്ക് ആവശ്യമായ സാമ്പത്തിക പിന്തുണ നല്കുന്നുണ്ടെന്ന് കേന്ദ്രസര്ക്കാര് അറിയിച്ചു. ഡല്ഹിയിലെ കേരളത്തിന്റെ സ്പെഷല് ഓഫീസറായി പ്രവര്ത്തിക്കുന്ന മുന് കേന്ദ്രമന്ത്രി പ്രൊഫ. കെ വി തോമസിന് നല്കിയ മറുപടിയിലാണ് കേന്ദ്രമന്ത്രി നിലപാട് വ്യക്തമാക്കിയത്.
