ഉഡുപ്പി: ഐനാസ് എന്ന 21 കാരിയെയും കുടുംബത്തിലെ മൂന്ന് പേരെയും ക്രൂരമായി കൊലപ്പെടുത്തിയ കേസില് എയര് ഇന്ത്യയുടെ ക്യാബിന് ക്രൂ അംഗം പ്രവീണ് അരുണ് ചൗഗുലെ (39) അറസ്റ്റില്. പ്രവീണിന്റെ സഹപ്രവര്ത്തകനുമായുള്ള ഐനാസിന്റെ ബന്ധത്തില് നിന്ന് ഉടലെടുത്ത അസൂയയും വിദ്വേഷവുമാണ് കുറ്റകൃത്യത്തിന് പിന്നിലെന്ന് പ്രവീണ് വെളിപ്പെടുത്തിയതായി പോലീസ് പറഞ്ഞു. വിവാഹിതനായ രണ്ട് കുട്ടികളുള്ള പ്രതിക്ക് ജോലിയുമായി ബന്ധപ്പെട്ട യാത്രയ്ക്കിടെ ഐനാസുമായി അടുത്ത ബന്ധം ഉണ്ടായിരുന്നു. പിന്നീട് ഐനാസ് സഹപ്രവര്ത്തകനുമായി അടുത്ത് ഇടപഴകിയതാണ് വിദ്വേശത്തിനുള്ള കാരണമായത്.
അയ്നാസ്, അവളുടെ അമ്മ ഹസീന (47), മൂത്ത സഹോദരി അഫ്നാന് (23), സഹോദരന് അസീം എന്നിവരെ വീടിനുള്ളില് വെച്ച് കുത്തിക്കൊന്ന സംഭവത്തിന് രണ്ട് ദിവസത്തിന് ശേഷമാണ് ചൗഗുലെ അറസ്റ്റിലായത്. ഉഡുപ്പി പോലീസ് ചൗഗുളയെ കണ്ടെത്താനും അറസ്റ്റ് ചെയ്യാനും മൊബൈല് ഫോണ് ലൊക്കേഷനും കോള് റെക്കോര്ഡുകളും ഉള്പ്പെടെയുള്ള സാങ്കേതിക ഡാറ്റ ഉപയോഗിച്ചു. കൊലപാതക സമയത്ത് ഇയാളുടെ ഫോണ് സംശയാസ്പദമായ രീതിയില് സ്വിച്ച് ഓഫ് ചെയ്തിരുന്നതായി അന്വേഷണത്തില് കണ്ടെത്തി.
കൊലപാതകം നടത്തിയ ശേഷം ചൗഗുലെ തന്റെ അമ്മാവനൊപ്പം ദീപാവലി ആഘോഷിക്കാന് ബെലഗാവിയിലെ കുടച്ചിയിലേക്ക് പോയി. കുറ്റകൃത്യം കണ്ടെത്തിയ അയല്വാസി നല്കിയ പരാതിയുടെ അടിസ്ഥാനത്തിലാണ് പോലീസ് അന്വേഷണം ആരംഭിച്ചത്. കൊലപാതകം നടന്ന ദിവസം രാവിലെ പ്രതിയെ ഇരകളുടെ വീട്ടിലേക്ക് കൊണ്ടുപോയത് താനാണെന്ന് വെളിപ്പെടുത്തി അന്വേഷണത്തില് ഒരു ഓട്ടോറിക്ഷാ ഡ്രൈവര് നിര്ണായക പങ്ക് വഹിച്ചു.
