ചെന്നൈ: കേന്ദ്ര-സംസ്ഥാന സര്ക്കാരുകള്ക്കെതിരെ ഗെറ്റ് ഔട്ട് ക്യാംപെയ്നുമായി തമിഴ് സൂപ്പര് സ്റ്റാര് വിജയ്. മഹാബലിപുരത്ത് നടന്ന തമിഴക വെട്രി കഴകം പാര്ട്ടിയുടെ ഒന്നാം വാര്ഷിക സമ്മേളനത്തില് സംസാരിക്കുകയായിരുന്നു അദ്ദേഹം.
തമിഴ്നാട് ഭരിക്കുന്ന ഡിഎംകെ സര്ക്കാരും കേന്ദ്രത്തിലെ ബിജെപി സര്ക്കാരും ജനവിരുദ്ധ നയങ്ങള് പിന്തുടരുകയാണെന്ന് വിജയ് കുറ്റപ്പെടുത്തി. തമിഴ്നാട്ടിലെ ജനങ്ങളുടെ യഥാര്ഥ പ്രശ്നങ്ങള് പരിഹരിക്കുന്നതില് ഇരു സര്ക്കാരുകളും പരാജയപ്പെട്ടുവെന്നും, പ്രശ്നങ്ങള് മറച്ചുവയ്ക്കാന് ഇരുപാര്ട്ടികളും യോജിച്ച് പ്രവര്ത്തിക്കുകയാണെന്നും അദ്ദേഹം പറഞ്ഞു.
“ഒരാള് പാടുമ്പോള് മറ്റൊരാള് നൃത്തം ചെയ്യുന്നു, ഇതുമൂലം സാധാരണക്കാരുടെ പ്രശ്നങ്ങള് പരിഹരിക്കപ്പെടുന്നില്ല,” എന്ന് വിജയ് വിമര്ശിച്ചു. തമിഴ് ഭാഷ അതിപ്രധാനമായ വികാരമാണെന്നും ഒരു ഭാഷയും അടിച്ചേല്പ്പിക്കാന് അനുവദിക്കില്ലെന്നും വിജയ് പറഞ്ഞു.
ജനങ്ങളുടെ യഥാര്ത്ഥ ആവശ്യങ്ങള് മറച്ച് വെച്ച് പബ്ലിസിറ്റി മുന്നിര്ത്തിയുള്ള ഭരണമാണ് ഡിഎംകെ സര്ക്കാര് നടത്തുന്നതെന്നും, ജനങ്ങളോട് തന്റെ പാര്ട്ടിയുടെ ഭാഗമാകാന് വിജയ് അഭ്യര്ഥിച്ചു. “സാധാരണക്കാരുടെ ബുദ്ധിമുട്ടുകള് കണ്ട് കണ്ണടച്ചിരിക്കാനാവില്ല,” എന്നും അദ്ദേഹം വ്യക്തമാക്കി.
