പാലക്കാട് തൃത്താലയിൽ ഉറ്റസുഹൃത്തുക്കളെ കൊലപ്പെടുത്തിയ സംഭവത്തിൽ പ്രതി മുസ്തഫയുടെ അറസ്റ്റ് രേഖപ്പെടുത്തി. ഒരു കൊലപാതകത്തില് ഇന്നലെ രാത്രിയിലും രണ്ടാം കൊലപാതകത്തില് ഇന്ന് രാവിലെയുമാണ് പ്രതിയുടെ അറസ്റ്റ് രേഖപ്പെടുത്തിയത്. പ്രതി മുസ്തഫയുടെ സുഹൃത്തുക്കളായിരുന്ന അൻസാർ, കബീർ എന്നിവരുടെ കൊലപാതകത്തെ തുടർന്നാണ് മുസ്തഫയെ പൊലീസ് അറസ്റ്റ് ചെയ്തത്.
കഴിഞ്ഞ വ്യാഴാഴ്ചയായിരുന്നു കഴുത്തിന് വെട്ടേറ്റ നിലയില് അന്സാര് ആശുപത്രിയിലെത്തുകയും വിദഗ്ധ ചികിത്സ ലഭിക്കുന്നതിന് മുമ്പ് മരണപ്പെട്ടതും. ഒരു ദിവസത്തിനിപ്പുറം കബീറിന്റെ മൃതദേഹം ഭാരതപ്പുഴയില് വെട്ടേറ്റ നിലയിലും കണ്ടെത്തുകയായിരുന്നു.
തൃത്താല റോഡില് കരിമ്പനക്കടവിന് സമീപം റോഡില് രക്തക്കറ കണ്ടെത്തിയതിനെ തുടര്ന്ന് നാട്ടുകാർ പൊലീസിനെ വിവരമറിയിച്ചതിനെ തുടർന്ന് നടത്തിയ തെരച്ചിലിലാണ് കബീറിൻ്റെ മൃതദേഹം കണ്ടെത്തുന്നത്. തന്നെ കൊലപ്പെടുത്താൻ ശ്രമിച്ചത് ഉറ്റസുഹൃത്ത് മുസ്തഫയാണെന്ന് അൻസാർ ആശുപത്രി അധികൃതർക്ക് മൊഴി നൽകിയിരുന്നു. അൻസാറിന്റെ മരണമൊഴിയുടെ അടിസ്ഥാനത്തിലാണ് മുസ്തഫയെ പൊലീസ് ഇന്നലെ കസ്റ്റഡിയിലെടുക്കുന്നത്.
മുസ്തഫയുടെ മൊബൈൽ നമ്പർ കേന്ദ്രീകരിച്ച് പോലീസ് നടത്തിയ അന്വേഷണത്തിലൊടുവിലാണ് ഇയാള് പിടിയിലാകുന്നത്. പൊലീസ് പിടികൂടുമ്പോൾ മുസ്തഫയുടെ ദേഹത്ത് രക്തക്കറ ഉണ്ടായിരുന്നു.
