ദില്ലി: രാജ്യസഭയിലെ ഒഴിവുള്ള സീറ്റുകളിലേക്ക് തെരഞ്ഞെടുപ്പ് പ്രഖ്യാപിച്ചു. 15 സംസ്ഥാനങ്ങളിലെ 56 രാജ്യസഭാ സീറ്റുകളിലേക്കുള്ള തിരഞ്ഞെടുപ്പ് ഫെബ്രുവരി 27 ന് നടക്കുമെന്ന് തിരഞ്ഞെടുപ്പ് കമ്മീഷന് പ്രഖ്യാപിച്ചു. നാമനിര്ദ്ദേശ പത്രിക സമര്പ്പിക്കാനുള്ള അവസാന തീയതി ഫെബ്രുവരി 15 ആയിരിക്കും. രാവിലെ ഒമ്പത് മുതല് വൈകീട്ട് നാല് വരെയാണ് പോളിങ്.
ഈ രാജ്യസഭാ സീറ്റുകളിലെ 50 അംഗങ്ങള് ഏപ്രില് 2 ന് വിരമിക്കുമെന്നും ആറ് പേര് ഏപ്രില് 3 ന് വിരമിക്കുമെന്നും തിരഞ്ഞെടുപ്പ് കമ്മീഷന് അറിയിച്ചു. മുന് പ്രധാനമന്ത്രി മന്മോഹന് സിങ്, ബിജെപി ദേശീയ അധ്യക്ഷന് ജെ പി നദ്ദ, കേന്ദ്രമന്ത്രി വി മുരളീധരന്, കേന്ദ്രമന്ത്രിമാരായ ധര്മേന്ദ്ര പ്രധാന്, അശ്വിനി വൈഷ്ണവ്, ഭുപേന്ദ്ര യാദവ്, മന്സുഖ് മാണ്ഡവ്യ, നാരായണ് റാണെ, പര്ഷോത്തം രുപാല, രാജീവ് ചന്ദ്രശേഖര് എന്നിവരുടെ കാലാവധി അവസാനിക്കും.
ഉത്തര്പ്രദേശില് നിന്നും പത്തും മഹാരാഷ്ട്രയില് ആറും സീറ്റുകളില് മത്സരം നടക്കുന്നുണ്ട്. ഭരണമാറ്റം ഉണ്ടായ രാജസ്ഥാന് , കര്ണാടക, തെലങ്കാന, ഛത്തീസ്ഗഡ് എന്നീ സംസ്ഥാനങ്ങളും രാജ്യസഭ തെരഞ്ഞെടുപ്പിലേക്ക് നീങ്ങും.
