അമിതവേഗത്തില് വാഹനമോടിച്ചതിനെ തുടര്ന്ന് നടന് സുരാജ് വെഞ്ഞാറമൂടിന്റെ ലൈസന്സ് സസ്പെന്ഡ് ചെയ്യാന് മോട്ടോര് വാഹന വകുപ്പ്. രാത്രി അമിത വേഗത്തില് ഓടിച്ച കാര് ഇടിച്ച് ബൈക്ക് യാത്രക്കാരനു പരുക്കേറ്റ സംഭവത്തിലാണ് നടപടി. ജൂലൈ 29ന് രാത്രി തമ്മനംകാരണക്കോടം റോഡില് വെച്ചാണ് സംഭവം നടന്നത്. ലൈസന്സ് സസ്പെന്ഡ് ചെയ്യാതിരിക്കാന് കാരണം ബോധിപ്പിക്കണമെന്ന് ആവശ്യപ്പെട്ട് മോട്ടോര് വാഹനവകുപ്പ് മൂന്ന് തവണ സുരാജ് വെഞ്ഞാറമൂടിന് നോട്ടീസ് അയച്ചിരുന്നു.
പാലാരിവട്ടം പൊലീസാണ് എഫ്ഐആര് മോട്ടര് വാഹന വകുപ്പിനു കൈമാറിയത്. മൂന്നുതവണ കാരണം കാണിക്കല് നോട്ടീസ് അയച്ചിട്ടും മറുപടി ലഭിക്കാതായതോടെയാണ് സസ്പെന്ഷന് നടപടി സ്വീകരിക്കാന് അധികൃതര് തീരുമാനിച്ചത്. സുരാജ് ഓടിച്ച കാര് ബൈക്കില് ഇടിച്ചു ബൈക്ക് യാത്രികന് മഞ്ചേരി സ്വദേശി ശരത്തിന്റെ (31) വലതു കാലിലെ പെരുവിരലിന്റെ അസ്ഥി ഒടിയുകയും മറ്റു നാലു വിരലുകള്ക്ക് മുറിവേല്ക്കുകയും ചെയ്തിരുന്നു.
