ലോകമെമ്പാടുമുള്ള ക്രിസ്ത്യാനികള് ഈസ്റ്ററിനു തൊട്ടു മുന്പുള്ള വെള്ളിയെ ദുഃഖവെള്ളിയാഴ്ച ആയി ആചരിക്കുന്നു. ഇന്ന് കേരളത്തിലെ ക്രൈസ്തവ ദേവാലയങ്ങളില് പ്രത്യേക പ്രാര്ത്ഥനാ ശുശ്രൂഷകള് നടക്കും. ക്രിസ്തുവിന്റെ കുരിശുമരണം അനുസ്മരിച്ച് കുരിശിന്റെ വഴികളും പീഡാനുഭവ വായനയും നഗരി കാണിക്കലുമെല്ലാം ദേവാലയങ്ങളില് നടക്കും.
യേശു ശിഷ്യന്മാരോടൊപ്പം അന്ത്യ അത്താഴം കഴിച്ച, അവരുടെ കാലുകള് കഴുകി വിനയത്തിന്റെ ഉദാത്ത മാതൃക കാണിച്ച പെസഹാ വ്യാഴത്തിന്റെ തുടര്ന്നുള്ള ഈ ദിവസത്തില് യേശുക്രിസ്തുവിന്റെ പീഡാസഹനത്തെയും കാല്വരി മലയിലെ കുരിശു മരണത്തെയും ക്രൈസ്തവര് അനുസ്മരിക്കുന്നു.
ക്രൈസ്തവ ദേവാലയങ്ങളില് ഈ ദിവസം പ്രത്യേക പ്രാര്ത്ഥനകളും യേശുക്രിസ്തുവിന്റെ പീഡാനുഭവവുമായി ബന്ധപ്പെട്ട ബൈബിള് ഭാഗങ്ങളുടെ വായനയും ഉണ്ട്. മിക്ക സ്ഥലങ്ങളിലും ഈ ദിവസം ഉപവാസദിനമായി ആചരിക്കുന്ന പതിവുണ്ട്. കുരിശില്ക്കിടന്നു ദാഹിക്കുന്നു എന്നു വിലപിച്ച യേശുവിനു കയ്പുനീര് കുടിക്കാന് കൊടുത്തതിന്റെ ഓര്മയില് വിശ്വാസികള് കയ്പുനീര് രുചിക്കുന്ന ആചാരവുമുണ്ട്. സഭകളുടെ അംഗീകൃത ആചാരമല്ലെങ്കിലും ഫിലിപ്പൈന്സ് പോലുള്ള രാജ്യങ്ങളില് വര്ഷം തോറും ചില വിശ്വാസികള് ദുഃഖവെള്ളിയാഴ്ച ദിനത്തില് പ്രതീതാത്മക കുരിശേറല് നടത്താറുണ്ട്.
