കണ്ണൂര്: പാനൂരില് ആളതാമസമില്ലാത്ത വീടിന്റെ മുകളില് നിന്ന് നിര്മാണത്തിനിടെ ബോംബ് പൊട്ടത്തെറിച്ച് യുവാവ് മരിക്കാനിടയായ സംഭവത്തില് പ്രത്യേക അന്വേഷണ സംഘം രൂപീകരിച്ചു. കൂത്തുപറമ്പ് എസിപി കെ വി വേണുഗോപാലിന്റെ നേതൃത്വത്തിലാണ് പ്രത്യേക സംഘത്തെ രൂപീകരിച്ചത്. സംഭവത്തില് മുഖത്തു ഗുരതരമായി പരിക്കേറ്റ മൂളിയാത്തോട് കാട്ടിന്റവിട ഷെറിന് (31) മരണപ്പെട്ടിരുന്നു. സംഭവ സ്ഥലത്തുനിന്നു കണ്ടെടുത്ത മുഴുവന് ബോംബുകളും നിര്വീര്യമാക്കിയതായി കണ്ണൂര് സിറ്റി പൊലീസ് കമീഷണര് അജിത്ത് അറിയിച്ചു.
സ്ഫോടനത്തില് സിപിഐഎം ലോക്കല് കമ്മിറ്റി അംഗത്തിന്റെ മകന് കൂടിയായ മൂളിയാത്തോട് വലിയപറമ്പത്ത് വിനീഷിന്റെ ഇരുകൈകളും അറ്റുപോയിരുന്നു. വീനിഷ് കോഴിക്കോട്ടേ സ്വകാര്യ ആശുപത്രിയില് ചികിത്സയിലാണ്. സംഭവത്തില് സമഗ്ര അന്വേഷണം നടത്തണമെന്ന് ആവശ്യപ്പെട്ട് സിപിഐഎം തന്നെ രംഗത്തെത്തിയിരുന്നു. ഇതിന്റെ പശ്ചാത്തലത്തലത്തിലാണ് അന്വേഷണത്തിന് പ്രത്യേക സംഘം രൂപീകരിച്ചത്. സംഭവത്തില് ഒരാളെ പൊലീസ് കസ്റ്റഡിയിലെടുത്തതായും സൂചനയുണ്ട്.
എന്നാല് സംഭവത്തില് പാര്ട്ടിക്ക് പങ്കില്ലെന്ന് സിപിഐഎം വ്യക്തമാക്കി. പാര്ട്ടി സമാധാനപരമായ തെരഞ്ഞെടുപ്പ് പ്രചരണങ്ങളാണ് നടത്തിവരുന്നത്. സ്ഫോടനത്തില് പരിക്കുപറ്റിയ ബിനീഷ്, ഷെറിന് എന്നിവര് സിപിഎം പ്രവര്ത്തകരെ അക്രമിച്ച കേസിലുള്പ്പെടെ പ്രതിയാണ്. ആ ഘട്ടത്തില് തന്നെ ഇയാളെ പാര്ട്ടി തളളി പറഞ്ഞതുമാണ്. സ്ഫോടനത്തില് പരിക്കുപറ്റിയവര് സിപിഎം പ്രവര്ത്തകര് എന്ന നിലയിലുള്ള പ്രചരണം ജനങ്ങളെ തെറ്റിദ്ധരിപ്പിക്കാന് ബോധപൂര്വ്വം എതിരാളികള് നടത്തുകയാണെന്നും പാര്ട്ടി അറിയിച്ചു.
