കോഴിക്കോട് വെസ്റ്റ് നൈല് പനി സ്ഥിരീകരിച്ച പശ്ചാത്തലത്തില് ജാഗ്രതാനിര്ദേശവുമായി ആരോഗ്യവകുപ്പ്. ക്യൂലക്സ് കൊതുക് വഴി പരത്തുന്ന ഒരു പകര്ച്ചവ്യാധിയാണ് വെസ്റ്റ് നൈല് പനി. ജപ്പാന് ജ്വരത്തെപ്പോലെ അപകടകരമല്ല. വൈസ്റ്റ് നൈല് പനി മുതിര്ന്നവരിലാണ് കാണുന്നത്. കൊതുകു ജന്യ രോഗമായതുകൊണ്ട് തന്നെ മഴക്കാല പൂര്വ്വ ശുചീകരണ പ്രവര്ത്തനങ്ങള് ഊര്ജിതമാക്കാന് ആരോഗ്യവകുപ്പ് നിര്ദ്ദേശം നല്കിയിട്ടുണ്ട്. പത്ത് പേര്ക്കാണ് രോഗം സ്ഥിരീകരിച്ചത്. ഇതില് അഞ്ച് പേര് രോഗമുക്തരായിട്ടുണ്ട്.
അതേ സമയം, ആശങ്കപ്പെടേണ്ട കാര്യമില്ലെന്നും പനിയോ മറ്റ് രോഗ ലക്ഷണങ്ങളോ ഉണ്ടെങ്കില് ഉടന് തന്നെ ചികിത്സ തേടേണ്ടതാണെന്ന് ആരോഗ്യ മന്ത്രി വീണാ ജോര്ജ് അഭ്യര്ഥിച്ചു. പ്രവര്ത്തനങ്ങള് കൂടുതല് ശക്തമാക്കാന് വേണ്ടി ജില്ലാ മെഡിക്കല് ഓഫീസര്മാര്ക്ക് നിര്ദേശം നല്കിയിട്ടുണ്ട്. ജില്ലാ ഭരണകൂടങ്ങളുമായും തദ്ദേശ സ്വയംഭരണ സ്ഥാപനങ്ങളുമായും ഏകോപിച്ചുള്ള പ്രവര്ത്തനങ്ങള് നടത്താനും നിര്ദേശം നല്കി. കോഴിക്കോട്, മലപ്പുറം ജില്ലകളിലാണ് രോഗം ഇതുവരെ സ്ഥിരീകരിച്ചത്. ജപ്പാന് ജ്വരത്തിന് സമാനമായ രോഗ ലക്ഷണങ്ങളോടെയാണ് വെസ്റ്റ് നൈല് പനിയും കാണാറുള്ളത്. എന്നാല് ജപ്പാന് ജ്വരത്തെ പോലെ രോഗം ഗുരുതരമാകാറില്ല. എങ്കിലും ജാഗ്രത പാലിക്കണമെന്നാണ് ആരോഗ്യവകുപ്പ് അറിയിച്ചിട്ടുള്ളത്.
പനി, തലവേദന, അപസ്മാരം, പെരുമാറ്റത്തിലെ വ്യത്യാസം, ബോധക്ഷയം, കൈകാല് തളര്ച്ച തുടങ്ങിയവയാണ് രോഗലക്ഷണങ്ങള്. ക്യൂലക്സ് കൊതുകുകളാണ് രോഗം പരത്തുന്നത്. മനുഷ്യനില് നിന്ന് മനുഷ്യരിലേക്കു രോഗം പകരില്ല. രോഗം ബാധിച്ച മൃഗം, പക്ഷി തുടങ്ങിയവയെ കടിച്ച കൊതുകു മനുഷ്യനെ കടിക്കുമ്പോഴാണ് രോഗം പകരുക.പ്രതിരോധ ശേഷി കുറഞ്ഞവരിലാണ് രോഗം കൂടുതല് അപകടകാരിയാകുക.
