വാഷിങ്ടണ്: ബിലീവേഴ്സ് ഈസ്റ്റേണ് ചര്ച്ച് മെത്രാപ്പൊലീത്ത ബിഷപ്പ് മോറാന് മോര് അത്തനേഷ്യസ് യോഹന്നാന് അന്തരിച്ചു. 74 വയസായിരുന്നു. ടെക്സാസില് ഇന്ന് രാവിലെ നടന്ന വാഹനാപകടത്തില് ഗുരുതരമായി പരിക്കേറ്റ് ചികിത്സയിലിരിക്കേയാണ് മരിച്ചത്. പ്രഭാത നടത്തത്തിനിടെയാണ് അപകടം സംഭവിച്ചത്.
പ്രഭാത നടത്തത്തിന് ഇറങ്ങിയ അദ്ദേഹത്തെ വാഹനം ഇടിക്കുകയായിരുന്നു. ഗുരുതരമായി പരിക്കേറ്റ യോഹന്നാനെ ആശുപത്രിയിലെ തീവ്രപരിചരണ വിഭാഗത്തില് പ്രവേശിപ്പിക്കുകയായിരുന്നു. അടിയന്തര ശസ്ത്രക്രിയക്ക് വിധേയനായെങ്കിലും രക്ഷിക്കാനായില്ല. നാല് ദിവസം മുന്പാണ് യോഹന്നാന് അമേരിക്കയില് എത്തിയത്.
അമേരിക്കയില് വൈദിക പഠനത്തിന് ചേര്ന്ന യോഹന്നാന് 1974 ല് അമേരിക്കയിലെ ഡാലസില് തിയോളജി പഠനം ആരംഭിച്ചു. ചെന്നൈ ഹിന്ദുസ്ഥാന് ബൈബിള് കോളെജില് നിന്നും ഡിഗ്രി കരസ്ഥമാക്കിയ യോഹന്നാന് നേറ്റീവ് അമേരിക്കന് ബാപ്പിസ്റ്റ് ചര്ച്ചില് പാസ്റ്ററായും പിന്നീട് വൈദിക ജീവിതം നടത്തുകയുമായിരുന്നു. 1983ലാണ് തിരുവല്ല നഗരത്തിനു ചേര്ന്ന മാഞ്ഞാടിയില് ഗോസ്പല് ഫോര് ഏഷ്യ എന്ന സുവിശേഷ പ്രചാരണ സംഘടനയ്ക്ക് രൂപം നല്കിയത്. 1990 ല് സ്വന്തം സഭയായ ബിലിവേഴ്സ് ചര്ച്ചിന് രൂപം നല്കി. 2003 ലാണ് സ്ഥാപക ബിഷപ്പായത്.
