തിരുവനന്തപുരം: ആമയിഴഞ്ചാന് തോട്ടില് കാണാതായ ജോയിയുടെ മൃതദേഹം കണ്ടെത്തിയതായി സ്ഥിരീകരിച്ചു. 46 മണിക്കൂര് നീണ്ട തെരച്ചിലിനൊടുവിലാണ് മൃതദേഹം കണ്ടെത്തിയത്. റെയില്വേയില് നിന്നുള്ള വെള്ളം ഒഴുകിയെത്തുന്ന തകരപ്പറമ്പ് ഭാഗത്തെ കനാലിലാണ് മൃതദേഹം കണ്ടെത്തിയത്. നാവിക സേനയുടെ മുങ്ങല് വിദഗ്ധരുടെ നേതൃത്വത്തില് ഇന്ന് തെരച്ചില് ആരംഭിച്ചിരുന്നു.
എന്ഡിആര്എഫും ഫയര്ഫോഴ്സും അടക്കം സംയുക്തമായാണ് തിരച്ചില് നടത്തിയത്. ഇന്ന് പുതിയ സംഘം തിരച്ചില് ആരംഭിച്ചിരുന്നു. മാലിന്യം നീങ്ങാത്തതാണ് ദൗത്യം വൈകിയത്. കാലങ്ങളായി കെട്ടിക്കിടക്കുന്ന മാലിന്യക്കൂമ്പാരത്തിലേക്ക് ഇറങ്ങിയാണ് ഫയര്ഫോഴ്സിന്റെ സ്കൂബാ ഡൈവിങ് സംഘം പരിശോധന നടത്തിയത്.
തമ്പാനൂര് റെയില്വേ സ്റ്റേഷനടുത്ത് ആമയിഴഞ്ചാന് തോട്ടിലെ മാലിന്യങ്ങള് വൃത്തിയാക്കുന്നതിനിടെയാണ് ജോയിയെ ഒഴുക്കില്പ്പെട്ട് കാണാതായത്. മൂന്നു പേരാണ് ശുചീകരണത്തിനായി തോട്ടില് ഇറങ്ങിയത്. മഴ കനത്തതോടെ ജോയി ഒഴുക്കില് പെടുകയായിരുന്നു. മാരായമുട്ടം സ്വദേശിയാണ് റെയില്വേയുടെ താല്ക്കാലിക തൊഴിലാളിയായ ജോയി.
