തിരുവനന്തപുരം: കര്ണ്ണാടകയിലെ മണ്ണിടിച്ചിലില് കാണാതായ അര്ജുനായുള്ള തിരച്ചില് തുടരണമെന്ന് കര്ണാടക മുഖ്യമന്ത്രി സിദ്ധരാമയ്യക്ക് കത്തയച്ച് മുഖ്യമന്ത്രി പിണറായി വിജയന്. തിരച്ചില് താത്കാലികമായി അവസാനിപ്പിക്കാനുള്ള തീരുമാനത്തെ തുടര്ന്നാണ് മുഖ്യമന്ത്രി കത്തയച്ചത്. രക്ഷാദൗത്യത്തില് നിര്ണായക പുരോഗതിയുണ്ടാകുന്നതുവരെ തിരച്ചില് തുടരണം. സാധ്യമായ എല്ലാ ഉപകരണങ്ങളും സൗകര്യങ്ങളും പ്രയോജനപ്പെടുത്തണമെന്നും മുഖ്യമന്ത്രി ആവശ്യപ്പെട്ടു. രക്ഷാദൗത്യത്തില് പങ്കെടുത്ത എല്ലാവരുടെയും അധ്വാനത്തെ അദ്ദേഹം കത്തില് പ്രശംസിച്ചു.
അതേ സമയം, രക്ഷാപ്രവര്ത്തനം നിര്ത്തിവെക്കരുതെന്ന് മന്ത്രി മുഹമ്മദ് റിയാസും ആവശ്യപ്പട്ടു. തിരച്ചില് നിര്ത്താനുള്ള തീരുമാനം ദൗര്ഭാഗ്യകരമാണ്. തിരച്ചില് നിര്ത്തിയത് കേരളവുമായി കൂടിയാലോചിക്കാതെയാണെന്നും മന്ത്രി റിയാസ് മാധ്യമങ്ങളോട് പ്രതികരിച്ചു. ഇന്നലെ നടത്തിയ ചര്ച്ചയില് പോലും തിരച്ചില് തുടരാനാണ് തീരുമാനിച്ചത്. ഉന്നതതലയോഗത്തിന്റെ തീരുമാനങ്ങള് നടപ്പാക്കിയില്ല. കര്ണാടക സര്ക്കാര് എല്ലാ സാധ്യതകളും പ്രയോജനപ്പെടുത്തുന്നില്ല. നേവല്ബേസിലെ ഏറ്റവും വൈദഗ്ധ്യതയുള്ള ഡൈവേഴ്സിനെ ഉപയോഗിക്കാന് തയ്യാറാകണം. തീരുമാനത്തില് നിന്നും കര്ണാടക സര്ക്കാര് പിന്മാറണം. മന്ത്രിമാര്ക്ക് അവിടെ പോകാനേ കഴിയൂ. മറ്റൊരു സംസ്ഥാനത്തെ ദൗത്യത്തില് ഇടപെടുന്നതില് പരിമിതിയുണ്ടെന്നും മുഹമ്മദ് റിയാസ് പറഞ്ഞു.
