മലയാള സിനിമാ രംഗത്ത് കാസ്റ്റിങ് കൗച്ച് നിലനില്ക്കുന്നുണ്ടെന്നും തനിക്ക് അനുഭവമുണ്ടെന്നും തുറന്നു പറഞ്ഞ് സുരേഷ് ഗോപിയുടെ മകന് ഗോകുല് സുരേഷ്. നടന് നിവിന് പോളിക്ക് എതിരെ ഉയര്ന്ന ആരോപണങ്ങളുമായി ബന്ധപ്പെട്ട ചോദ്യങ്ങള്ക്ക് മാധ്യമങ്ങളോട് സംസാരിക്കുകയായിരുന്നു താരം.
എപ്പോഴും ഒരു ജെന്ഡര് മാത്രമാണ് ദുരനുഭവം നേരിടുന്നതെന്ന് പറയാനാകില്ല. കാസ്റ്റിങ് കൗച്ച് നേരിടുന്ന നടന്മാര്ക്ക് സിനിമകള് നഷ്ടപ്പെടുന്ന അവസ്ഥയുണ്ടാകാം. അതിന് സമാനമായ ഒരു അവസ്ഥയിലൂടെ തുടക്കകാലത്ത് ഞാനും കടന്ന് പോയിട്ടുണ്ട്. അതിനെക്കുറിച്ച് ഇപ്പോള് സംസാരിക്കാന് താല്പര്യമില്ല. കാസ്റ്റിങ് കൗച്ചിന് കാരണമായ ആളെ ഞാന് തന്നെ തക്കതായ രീതിയില് കൈകാര്യം ചെയ്തിട്ടുണ്ട്.
പക്ഷേ എനിക്ക് ആ സിനിമ നഷ്ടപ്പെട്ടു. ഇപ്പോള് സിനിമ മേഖലയില് നടക്കുന്ന വിഷയങ്ങളെക്കുറിച്ച് സോഷ്യല് മീഡിയ വിളമ്പുന്നതായിരിക്കും സാധാരണ ജനങ്ങള്ക്ക് മനസിലാകുന്നത്. അത്തരം സാഹചര്യത്തിലാണ് ഇപ്പോള് നിവിന് ചേട്ടനെതിരായിട്ടൊരു ആരോപണം വരുന്നതും അത് തിരിയുന്നതും. സ്ത്രീകളെ മാത്രമല്ല പുരുഷന്മാരെയും ബാധിക്കാമെന്നൊരു ബോധ്യം ജനങ്ങള്ക്ക് മനസിലാകുന്നുണ്ടാകും. രണ്ട് കൂട്ടരും ഇരകളാകാം എന്ന് ബോധ്യമായിട്ടുണ്ടാകും.
ജെനുവിന് കേസില് ഇരകള്ക്കൊപ്പം തന്നെയാണ് നില്ക്കേണ്ടത്. പക്ഷേ നിവിന് ചേട്ടന്റെ പോലെ നിരപരാധിയെന്ന് ഞാന് വിശ്വസിക്കുന്ന കേസിലൊക്കെ വിഷമമുണ്ട്. ഞാനെന്നൊരു മനുഷ്യന്, ഞാന് ഹീറോയായി കാണുന്ന ഒരാള് ഇരയായി എന്നറിഞ്ഞതില് വിഷമമുണ്ടെന്നും താരം പറഞ്ഞു.
