കൊല്ക്കത്ത: ആര്ജി കര് മെഡിക്കല് കോളേജ് ആശുപത്രിയിലെ പിജി ഡോക്ടറുടെ കൊലപാതകത്തില് പ്രതിഷേധിച്ചുള്ള സമരം തുടരുമെന്ന് ജൂനിയര് ഡോക്ടര്മാര്. സമരം അവസാനിപ്പിക്കണമെന്ന സുപ്രീംകോടതി നിര്ദേശം അംഗീകരിക്കില്ലെന്നാണ് ഡോക്ടര്മാരുടെ നിലപാട്. വനിത ഡോക്ടറുടെ ബലാത്സംഗക്കൊലപാതകത്തില് ഇടപെട്ട സുപ്രീം കോടതി ഇന്നലെ പ്രതിഷേധം അവസാനിപ്പിച്ച് സേവനം തുടരാന് സമരം ചെയ്യുന്ന ഡോക്ടര്മാരോട് നിര്ദ്ദേശിച്ചിരുന്നു. കൊല്ക്കത്ത പൊലീസ് കമ്മീഷണറും ആരോഗ്യ സെക്രട്ടറിയും രാജി വെക്കണമെന്നാണ് പ്രതിഷേധക്കാരുടെ ആവശ്യം. ആരോഗ്യ വകുപ്പ് ആസ്ഥാനത്തേക്ക് മാര്ച്ച് നടത്തുമെന്നും ജൂനിയര് ഡോക്ടര്മാര് അറിയിച്ചു.
ഇന്ന് വൈകിട്ട് അഞ്ച് മണിക്കുള്ളില് ജോലിയിലേക്ക് മടങ്ങണമെന്നാണ് കോടതി ഇന്നലെ നിര്ദേശിച്ചിരുന്നത്. പൊതുസമൂഹത്തിന് സേവനം നല്കാന് ഡോക്ടര്മാര്ക്ക് ബാധ്യതയുണ്ടെന്ന് മറക്കരുതെന്നും ഡോക്ടമാര് തിരികെ പ്രവേശിച്ചില്ലെങ്കില് പശ്ചിമ ബംഗാള് സര്ക്കാരിന് നടപടി സ്വീകരിക്കാമെന്നും സുപ്രീം കോടതി അറിയിച്ചിരുന്നു.
