ബംഗളൂരു: ഗംഗാവലിപ്പുഴയില് അര്ജുനായുള്ള തിരച്ചില് നിര്ണ്ണായക ഘട്ടത്തില്. പുഴയുടെ അടിത്തട്ടില് നിന്ന് ലോറിയുടെ ഭാഗം കണ്ടെത്തിയതായി ഈശ്വര് മാല്പെ പറഞ്ഞു. രണ്ടു ടയറിന്റെ ഭാഗങ്ങളാണ് കണ്ടെത്തിയതെന്നും ഇത് അര്ജുന്റെ ലോറിയുടെ ഭാഗങ്ങള് തന്നെയാണോ എന്നറിയില്ലെന്നും മാല്പെ പറഞ്ഞു. മണ്ണിടിച്ചിലില് കാണാതായ അര്ജുനുള്പ്പെടെ മൂന്നുപേരെ കണ്ടെത്താനായി ഡ്രഡ്ജര് ഉപയോഗിച്ചുള്ള തിരച്ചില് ഇന്ന് രാവിലെയാണ് പുനഃരാരംഭിച്ചത്.
ഈശ്വര് മല്പെയും സംഘവും പുഴയിലിറങ്ങി തിരച്ചില് നടത്തുകയാണ്. നേരത്തെ പുഴയില്നിന്ന് അക്കേഷ്യ മരക്കഷണങ്ങള് മല്പെ കണ്ടെത്തിയിരുന്നു. അര്ജുന് ലോറിയില് കൊണ്ടുവന്ന തടികളാണിതെന്ന് ലോറി ഉടമ മനാഫ് സ്ഥിരീകരിച്ചിരുന്നു. നാവിക സേന നിര്ദേശിച്ച മൂന്നു പ്രധാന പോയന്റുകളിലാണ് തിരച്ചില് നടത്തുന്നത്. കാര്വാറില്നിന്ന് എത്തിച്ച ഡ്രജര് ഉപയോഗിച്ചാണ് തിരച്ചില്. വെള്ളിയാഴ്ച ഡ്രജര് ഉപയോഗിച്ചുള്ള പരിശോധനയില് ലോറിയുടെ ലോഹഭാഗം കണ്ടെത്തിയിരുന്നു. മൂന്ന് ദിവസം തിരച്ചില് നടത്താനാണ് ഡ്രഡ്ജര് കമ്പനിയുമായുള്ള കരാര്.
