മലപ്പുറം: എല്ഡിഎഫ് ബന്ധം ഉപേക്ഷിച്ച് നിലമ്പൂര് എംഎല്എ പി വി അന്വര്. പാര്ലമെന്ററി പാര്ട്ടി യോഗത്തില് പങ്കെടുക്കില്ലെന്ന് അറിയിച്ച അന്വര് എംഎല്എ സ്ഥാനം രാജിവെക്കില്ലെന്നും അറിയിച്ചു. ‘പൊട്ടനാണ് പ്രാന്തന്. ആ പ്രാന്ത് എനിക്ക് ഇല്ല. ഈ മൂന്ന് അക്ഷരം ജനങ്ങള് എനിക്ക് തന്നതാണ്. ആ പൂതിവെച്ച് ആരും നില്ക്കണ്ട. മരിച്ചുവീഴുന്നത് വരെ, ഈ ഒന്നേമുക്കാല് കൊല്ലം ഞാന് ഉണ്ടെങ്കില് എംഎല്എ ഉണ്ടാവും. അതിന് അടിയില് വെറെ എന്തെങ്കിലും സംഭവിച്ചാല് ഓകെ. എംഎല്എ ഇപ്പോ രാജിവെയ്ക്കോ, എംഎല്എ ഇപ്പോ രാജിവെയ്ക്കോ ആ പൂതി ആര്ക്കും വേണ്ട’- പി വി അന്വര് മാധ്യമങ്ങളോട് പറഞ്ഞു.
വിവാദങ്ങള് കത്തുന്നതിനിടെ പുതിയ പാര്ട്ടി പ്രഖ്യാപന സാധ്യത അന്വര് തള്ളിയിട്ടില്ല. എംഎല്എ സ്ഥാനം രാജിവെക്കുമെന്ന അഭ്യൂഹങ്ങള്ക്കിടെയാണ് അന്വറിന്റെ വെളിപ്പെടുത്തല്. ഞായറാഴ്ച നിലമ്പൂരില് പൊതുസമ്മേളനം വിളിക്കുമെന്നും അന്ന് അടുത്ത നീക്കം ജനങ്ങളെ അറിയിക്കുമെന്നും അന്വര് പറഞ്ഞു. ജനങ്ങളാണ് എന്നെ തെരഞ്ഞെടുത്ത് അയച്ചത്. ഭാവി പരിപാടികള് അവിടെ വച്ച് തീരുമാനിക്കും. ഞാന് മറ്റൊരു പാര്ട്ടിയിലേക്കും പോകില്ല. കോണ്ഗ്രസും സിപിഎമ്മും ലീഗും തമ്മില് നെക്സസ് ഉണ്ട്. ലീഗിന്റെയും കോണ്ഗ്രസിന്റെയും നേതാക്കള് പറഞ്ഞത് അന്വറിനെ പാര്ട്ടിയിലേക്ക് എടുക്കില്ലെന്നാണ്. ഇവരെ കണ്ടല്ല ഞാന് നടക്കുന്നത്. ജനങ്ങള്ക്കൊപ്പം നിന്ന് പ്രവര്ത്തിക്കും. പാര്ട്ടി പ്രവര്ത്തകരിലും കോടതിയിലുമാണ് ഇനി വിശ്വാസമുള്ളത്. പാര്ട്ടിയിലെ സാധാരണക്കാരായ സഖാക്കളുടെ പിന്തുണ തനിക്കുണ്ടെന്നും അന്വര് പറഞ്ഞു.
