ന്യൂഡല്ഹി: ലൈംഗികാതിക്രമ കേസില് നടന് സിദ്ദിഖിന്റെ അറസ്റ്റ് തടഞ്ഞ് സുപ്രീംകോടതി. രണ്ടാഴ്ചത്തേയ്ക്കാണ് അറസ്റ്റ് തടഞ്ഞത്. സിദ്ധീഖ് നല്കിയ മുന്കൂര് ജാമ്യാപേക്ഷയില് പരാതി നല്കിയ നടിയുടെയും സംസ്ഥാന സര്ക്കാരിന്റെയും എതിര്പ്പ് തള്ളിയാണ് ജസ്റ്റിസ് ബേല എം ത്രിവേദി, സതീഷ് ചന്ദ്ര ശര്മ എന്നിവര് അടങ്ങിയ ബെഞ്ചിന്റെ നടപടി.
അതിജീവിത പരാതി നല്കാന് കാലതാമസം വന്നത് പരിഗണിച്ചാണ് സുപ്രീകോടതിയുടെ നടപടി. അതേ സമയം, അന്വേഷണത്തോട് സിദ്ദിഖ് സഹകരിക്കണമെന്ന് സുപ്രീംകോടതി ആവശ്യപ്പെട്ടു. വിചാരണക്കോടതി മുന്നോട്ടുവെയ്ക്കുന്ന ഉപാധികള് സിദ്ദിഖ് പാലിക്കണമെന്നും സുപ്രീംകോടതി നിര്ദേശിച്ചു. സിദ്ദിഖിന്റെ മകനും നടനുമായ ഷഹീനും കോടതിയില് എത്തിയിരുന്നു.
ലൈംഗികാതിക്രമ കേസില് ഹൈക്കോടതി മുന്കൂര് ജാമ്യാപേക്ഷ തള്ളിയതോടെയാണ് നടന് സിദ്ധിഖ് സുപ്രീം കോടതിയിലെത്തിയത്. സിദ്ദിഖിന് വേണ്ടി മുതിര്ന്ന അഭിഭാഷകന് മുകുള് റോത്തഗിയാണ് ഹാജരായത്. ഹാജരായി. പരാതി നല്കാന് കാലതാമസമുണ്ടായി എന്നതായിരുന്നു സിദ്ദിഖിന് വേണ്ടി മുകുള് റോത്തഗി കോടതിയെ അറിയിച്ചത്. ഇത് പരിഗണിച്ച കോടതി സംസ്ഥാന സര്ക്കാരിനെതിരെ രൂക്ഷ വിമര്ശനം ഉന്നയിച്ചു. എട്ട് വര്ഷം സര്ക്കാര് എന്തുചെയ്യുകയായിരുന്നുവെന്ന് സുപ്രീംകോടതി ചോദിച്ചു. കേസ് രജിസ്റ്റര് ചെയ്യാന് എന്തുകൊണ്ട് വൈകി എന്ന കാര്യം സര്ക്കാര് വിശദീകരിക്കണമെന്നും സുപ്രീംകോടതി ആവശ്യപ്പെട്ടു. പരാതി നല്കാന് എന്തുകൊണ്ട് വൈകി എന്ന കാര്യം വ്യക്തമാക്കി അതിജീവിത സത്യവാങ്മൂലം സമര്പ്പിക്കണമെന്നും കോടതി നിര്ദേശിച്ചു. കേസ് രണ്ടാഴ്ചയ്ക്ക് ശേഷം വീണ്ടും പരിഗണിക്കും.
