തിരുവനന്തപുരം: വിവാദങ്ങള്ക്കിടയില് പതിനഞ്ചാം നിയമസഭയുടെ പന്ത്രണ്ടാം സമ്മേളനം നാളെ ആരംഭിക്കും. പി വി അന്വര് എംഎല്എ നടത്തിയ ആരോപണങ്ങള്ക്കും വെളിപ്പെടുത്തലുകള്ക്കും ഇടയിലാണ് നാളെ നിയമസഭാ സമ്മേളനത്തിന് തുടക്കമാകുന്നത്. മുണ്ടക്കൈ ഉരുള്പൊട്ടലില് ജീവന് നഷ്ടമായവര്ക്ക് ആദരാഞ്ജലി അര്പ്പിച്ച് ആദ്യദിനത്തില് സമ്മേളനം പിരിയും.
എഡിജിപി- ആര്എസ്എസ് കൂടിക്കാഴ്ച മുതല് മുഖ്യമന്ത്രിയുടെ അഭിമുഖ വിവാദം ഉള്പ്പെടെ ചൂടേറിയ വാദപ്രതിവാദങ്ങള്ക്ക് സഭ വേദിയാകും. എഡിജിപിക്കും പി ശശിക്കും എതിരെ പി വി അന്വര് ഉന്നയിച്ച ആരോപണങ്ങള് പ്രതിപക്ഷം പ്രധാന ആയുധമാക്കും. പൊലീസിന്റെ സ്വര്ണം പൊട്ടിക്കലും മാമിയുടെ തിരോധാനവും പി വി അന്വര് ഉന്നയിച്ച നിരവധി ആരോപണങ്ങളുണ്ട്. കൂടാതെ, തൃശൂര് പൂരം കലക്കല് വിവാദം. വിവാദങ്ങളുടെ കെട്ടഴിഞ്ഞു വീണ സന്ദര്ഭത്തിലാണ് സമ്മേളനം നടക്കുന്നത്.
എഡിജിപി മുഖ്യമന്ത്രിക്കുവേണ്ടി പൂരം കലക്കി എന്ന ആരോപണം പ്രതിപക്ഷം നിയമസഭയിലും ഉന്നയിക്കും. ആര്എസ്എസ് നേതാക്കളെ എഡിജിപി കണ്ടതും സഭയില് പ്രതിപക്ഷം ഉന്നയിച്ചേക്കും. ദ ഹിന്ദു പത്രത്തിന് മുഖ്യമന്ത്രി നല്കിയ അഭിമുഖം, പിആര് കമ്പനിയുടെ ഇടപെടല് ഇങ്ങനെ സഭാ സമ്മേളന കാലത്ത് പ്രതിപക്ഷം പുറത്തിറക്കും.
