നാദാപുരം: ഡിവൈഎഫ്ഐ പ്രവര്ത്തകനായ തൂണേരി ഷിബിന് വധക്കേസില് പ്രതികളെ വെറുതെവിട്ട നടപടി ഹൈക്കോടതി റദ്ദാക്കി. എട്ട് പ്രതികളെ വെറുതെവിട്ട എരഞ്ഞിപ്പാലം അഡീഷണല് സെഷന്സ് കോടതിയുടെ നപടിയാണ് ഹൈക്കോടതി ഡിവിഷന് ബെഞ്ച് റദ്ദാക്കിയത്. 1 മുതല് 6 വരെ പ്രതികളും 15, 16 പ്രതികളും കുറ്റക്കാരെന്ന് ഹൈക്കോടതി പറഞ്ഞു.
സര്ക്കാരിന്റെ ഉള്പ്പെടെ അപ്പീലിലാണ് വിധി. കേസില് മുസ്ലീം ലീഗ് പ്രവര്ത്തകരായ പ്രതികളെയാണ് വെറുതെ വിട്ടത്. ഈ മാസം 15ന് ശിക്ഷ വിധിക്കും. ശിക്ഷ വിധിക്കുന്ന ദിവസം പ്രതികള് നേരിട്ട് കോടതിയില് ഹാജരാകണമെന്ന് കോടതി നിര്ദേശിച്ചു.
2015 ജനുവരി 22ന് രാത്രിയായിരുന്നു നാടിനെ ഞെട്ടിച്ച കൊലപാതകം നടന്നത്. സംഭവ ദിവസം രാത്രി രാഷ്ട്രീയ വിരോധത്താല് മുസ്ലിം ലീഗ് പ്രവര്ത്തകര് സംഘം ചേര്ന്ന് ഷിബിനെ കൊലപ്പെടുത്തുകയായിരുന്നു. ഒന്നുമുതല് 11വരെയുള്ള പ്രതികള് കൊലപാതക സംഘത്തിലുള്ളവരും 12 മുതല് 17വരെ പ്രതികള് കൊലയാളികളെ രക്ഷപ്പെടാനും ഒളിവില് കഴിയാനും സഹായിച്ചവരുമാണ്. 66 സാക്ഷിമൊഴികളും 151 രേഖകളും 55 തൊണ്ടി മുതലുകളുമാണ് പൊലീസ് സമര്പ്പിച്ചിരുന്നത്.
