തിരുവനന്തപുരം: സിഎംആര്എല് എക്സാലോജിക് കേസില് മുഖ്യമന്ത്രിയുടെ മകള് വീണാ വിജയന്റെ മൊഴി രേഖപ്പെടുത്തി എസ്എഫ്ഐഒ. അന്വേഷണ ഉദ്യോഗസ്ഥനായ അരുണ് പ്രസാദാണ് കഴിഞ്ഞ ബുധനാഴ്ച്ച മൊഴിയെടുത്തത്. കേസില് അന്വേഷണം ഏറ്റെടുത്ത് മാസങ്ങള്ക്കിപ്പുറമാണ് മൊഴി രേഖപ്പെടുത്തുന്നത്. കഴിഞ്ഞ ജനുവരിയിലാണ് കേസില് എസ്എഫ്ഐഒ അന്വേഷണം പ്രഖ്യാപിച്ചത്. ചെന്നൈയിലെ ഓഫീസില് എത്തിയാണ് വീണ വിജയന് മൊഴി നല്കിയത്. എക്സാലോജിക്കിന് മാസപ്പടിയായി പണം ലഭിച്ചുവെന്നായിരുന്നു ആരോപണം. എട്ട മാസമാണ് അന്വേഷണം പൂര്ത്തിയാക്കാന് കേന്ദ്രസര്ക്കാര് നല്കിയത്. ആ സമയപരിധി അവസാനിക്കാനിരിക്കെയാണ് അന്വേഷണം നേരിട്ട് വീണാവിജയനിലേക്ക് എത്തുന്നത്. മാസപ്പടി വിവാദമുണ്ടായി മാസങ്ങള്ക്കു ശേഷമാണ് എസ്.എഫ്.ഐ.ഒ നീക്കം.
സി എം ആര് എല് വീണ വിജയന്റെ ഉടമസ്ഥതയിലുള്ള എക്സാലോജിക് സൊലൂഷ്യന്സ് എന്ന കമ്പനിക്ക് നല്കാത്ത സേവനത്തിന് 2017- 20 കാലയളവില് വലിയ തുക പ്രതിഫലം നല്കി എന്ന ഇന്ററിം സെറ്റില്മെന്റ് ബോര്ഡിന്റെ കണ്ടെത്തലാണ് മാസപ്പടി വിവാദത്തിന് തിരികൊളുത്തിയത്. തുടര്ന്ന് കേന്ദ്ര ഏജന്സികള് അന്വേഷണം ഏറ്റെടുക്കുകയായിരുന്നു. ഇതിന് പിന്നാലെ പ്രതിപക്ഷം ആരോപണം കടുപ്പിക്കുകയായിരുന്നു. മാത്യൂ കുഴല്നാടന് എംഎല്എയാണ് ഇക്കാര്യം സഭയില് ഉന്നയിച്ചത്. സി.എം.ആര്.എല്ലില്നിന്ന് കൈപ്പറ്റിയ പണത്തിന് വീണ ഐ.ജി.എസ്.ടി. അടച്ചതായി നികുതി വകുപ്പിന്റെ കണ്ടെത്തലും പുറത്ത് വന്നിരുന്നു.
